ՀՅԴ Հայաստանի ԳՄ ներկայացուցիչ, ԱԺ «Հայաստան» խմբակցութեան պատգամաւոր Իշխան Սաղաթելեանն անդրադարձել է Նիկոլ Փաշինեանի ամանորեայ ուղերձում արուած այն յայտարարութեանը, թէ ոչ միայն Ղարաբաղը մերը չի եղել, այլեւ Հայաստանի Հանրապետութիւնը:
«Ուրեմն, Նիկոլ Փաշինեանն իր ամանորեայ ուղերձում սահմանեց նոր ռեկորդ, յայտարարելով, որ ոչ միայն Ղարաբաղը մերը չի եղել, այլ նաեւ Հայաստանը, եւ Հայաստանը այլեւս մերն է, բացառապէս իր քայլերի եւ գործողութիւնների արդիւնքում։ Ուրեմն, լսէ՛ք, մինչեւ ձեր իշխանութեան ղեկին յայտնուելը ոչ միայն Հայաստանն էր մերը, այլ նաեւ՝ Արցախը։ Եւ ձեր գործունէութեան արդիւնքում է, որ յանձնուեց Արցախը, իսկ Հայաստանի պետականութիւնն այսօր գտնւում է վտանգի տակ։
Փաշինեանի բոլոր նմանատիպ յայտարարութիւնները գալիս են մէկ անգամ եւս փաստելու, որ Արցախեան պատերազմի արդիւնքը ոչ թէ անկարողութեան, պակաս սպառազինութեան, ձախողուած կառավարման արդիւնք էր, այլ գիտակցուած դաւաճանական քայլ, եւ այդ քայլի արդիւնքում մենք ունեցել ենք 5000 զոհ, 150․000 մարդ մնացել է անտուն, եւ այդ ամէնի մեղաւորը եւ պատասխանատուն անձամբ դու ես Նիկոլ Փաշինեան, հետեւաբար, բոլոր փորձերն արդարանալու, մարդկանց կրկին խաբելու, վերարտադրուելու չի ստացուելու։
Ու երբ որ յայտարարում ես՝ «ես երբեւէ զիջումներ չեմ արել», դո՛ւ արել ես այդ զիջումները եւ այդ զիջումների արդիւնքում այսօր նաեւ Ադրբեջանի զօրքերը գտնւում են Հայաստանի ինքնիշխան տարածքում։ Սա՛ է իրականութիւնը եւ այս ամէն ինչի համար դուք պէտք է պատասխան տաք»,-ասաց Իշխան Սաղթելեանը։
