Հայկական Բարեգործական Ընդհանուր Միութեան Կենտրոնական վարչութեան նամակը՝ ուղղուած Հայաստանի Հանրապետութեան Ազգային ժողովի նախագահ Ռուբէն Ռուբինեանին եւ Ազգային ժողովի անդամներին
Յարգելի պրն. Ռուբինեան,
Հայաստանի Հանրապետութեան կառավարութեան՝ 2026-2031 թթ. ծրագիրը, որը 2026 թ. օգոստոսի 20-ին ՀՀ Ազգային ժողովին է ներկայացուել քննարկման եւ հաստատման նպատակով, ներառում է մի շարք համապարփակ նախաձեռնութիւններ, որոնց վերաբերեալ Հայկական Բարեգործական Ընդհանուր Միութիւնը մեկնաբանութիւններ անելն իր իրաւասութիւնը չի համարում։
Մեր լուրջ մտահոգութիւնը շարունակում են առաջացնել Հայաստանեայց Առաքելական Եկեղեցուն վերաբերող դրոյթները։ Հայաստանեայց Առաքելական Եկեղեցին դարեր շարունակ պահել ու պահպանել է քրիստոնէական հաւատքը, հայ ինքնութիւնն ու աշխարհասփիւռ հայութեան միասնութիւնը։ Հաշուի առնելով, որ Եկեղեցու հաւատացեալների մեծամասնութիւնն ապրում է Հայաստանի Հանրապետութեան սահմաններից դուրս՝ այն մշտապէս պահպանել է իր ինքնակառավարման անկախ համակարգը։
Այս պատմական աւանդոյթին, ինչպէս նաեւ ՀՀ Սահմանադրութեան եւ օրէնքների, կրօնական ազատութեան միջազգային պաշտպանութեան եւ Կանոնական իրաւունքի համաձայն՝ Կառավարութեան ծրագրում Եկեղեցուն վերաբերող դրոյթները, մասնաւորապէս՝ Ամենայն Հայոց Կաթողիկոսի հրաժարականի կամ ընտրութեան, ինչպէս նաեւ Եկեղեցու կանոնադրութեան ընդունման հարցերը, չեն կարող թելադրուել որեւէ քաղաքական իշխանութեան կողմից։
Ինքնակառավարման այս դարաւոր սկզբունքն արտացոլում է Հայաստանեայց Առաքելական Եկեղեցու համաշխարհային բնոյթն ու դերակատարութիւնը։ Մենք յարգանքով խնդրում ենք Ազգային ժողովին մերժել այս հարցում միջամտելու Կառավարութեան առաջարկն ու յարգել Եկեղեցու կառավարման հաստատուած ու դարերով պահպանուած սկզբունքները։
Յարգանքով՝
ՀԲԸՄ Կենտրոնական վարչութիւն
Նամակն ուղարկուել է օգոստոսի 25-ի վաղ առաւօտեան՝ դիտարկման համար։
