Ամենայն Հայոց Կաթողիկոս Գարեգին Բ-ն հոկտեմբերի 6-ին Մայր Աթոռ Սուրբ Էջմիածնում հանդիպել է իրաւաբանների, իրաւապաշտպանների եւ սահմանադրական իրաւունքի մասնագէտների հետ՝ քննարկելու Հայ Առաքելական Եկեղեցու դէմ Փաշինեանի իշխանութեան նախաձեռնութիւնները։
Քննարկման առանցքում եղել են Նիկոլ Փաշինեանի յանձնարարութեամբ պատրաստուած զեկոյցը, Ազգային ժողովում ստեղծուած քննիչ յանձնաժողովը, հոգեւորականների դէմ քրէական վարոյթները եւ Եկեղեցու պաշտպանութեան հնարաւոր իրաւական քայլերը։
Իրաւագէտ Գէորգ Դանիէլեանն ու փաստաբան Արա Զոհրաբեանը ներկայացրել են զեկոյցի բովանդակութիւնը եւ Փաշինեանի կառավարութեան 2026–2031 թուականների ծրագրում ներառուած Եկեղեցու «բարեփոխման» օրակարգը։
Փաշինեանի գրասենեակին ենթակայ Հանրային կապերի եւ տեղեկատուութեան կենտրոնը սեպտեմբերի 24-ին հրապարակել էր զեկոյց, որտեղ յայտարարւում է Հայ Առաքելական Եկեղեցում «ճգնաժամի» մասին եւ թուարկւում են 16 ենթադրեալ խնդիրներ՝ հոգեւորականների վարքագծից ու ֆինանսական անթափանցիկութիւնից մինչեւ «կլանային կառավարում», քաղաքականացում եւ արտաքին ազդեցութիւն։
Զեկոյցը նախատեսում է հինգ քայլից բաղկացած ճանապարհային քարտէզ, իսկ Փաշինեանի օրակարգը՝ Գարեգին Բ-ի հեռացում, Եկեղեցու ժամանակաւոր ղեկավարի նշանակում, նոր կանոնադրութեան ընդունում եւ հետագայում նոր Կաթողիկոսի ընտրութիւն։ Փաշինեանը հետագայում նաեւ յայտարարել էր, թէ Եկեղեցին «զաւթուել է» Գարեգին Բ-ի եւ նրա կողմնակիցների կողմից։
Հոկտեմբերի 6-ին Դատախազութիւնը հաստատել է, որ զեկոյցում ներկայացուած պնդումներն ուսումնասիրում է հնարաւոր յանցագործութեան յատկանիշների տեսանկիւնից, սակայն չի յայտնել՝ արդեօք նոր քրէական վարոյթներ են նախաձեռնուել։
Հանդիպման մասնակիցներն Ազգային ժողովի քննիչ յանձնաժողովի ստեղծումը որակել են բացայայտ հակասահմանադրական միջամտութիւն՝ ընդգծելով, որ խորհրդարանը լիազօրութիւն չունի վերահսկելու Եկեղեցու ղեկավարումը, վարչական կամ կանոնական կեանքը։
Նրանց գնահատմամբ՝ նման միջամտութիւնը խախտում է պետութեան եւ կրօնական կազմակերպութիւնների տարանջատման սահմանադրական սկզբունքը, ինչպէս նաեւ Եկեղեցու ինքնակառավարման իրաւունքը։
Նոյն օրը «Քաղաքացիական պայմանագիրը» 62 ձայնով հաստատել է յանձնաժողովի 11-հոգանոց կազմը։ Եօթ տեղ յատկացուել է ՔՊ-ին, իսկ ընդդիմադիր «Ուժեղ Հայաստան» եւ «Հայաստան» խմբակցութիւնները հրաժարուել են մասնակցել յանձնաժողովի աշխատանքներին։
Իրաւաբանները նաեւ քննարկել են Եկեղեցու եւ հոգեւորականների պաշտպանութեան ներպետական ու միջազգային իրաւական մեխանիզմները։ Գարեգին Բ-ն յայտարարել է, որ Մայր Աթոռը պահանջում է յարգել օրէնքի գերակայութիւնն ու Եկեղեցու սահմանադրական ինքնավարութիւնը։
