Արցախի հայկական հոգեւոր-մշակութային ժառանգութեան նկատմամբ շարունակուող ոտնձգութիւնները պէտք է արժանանան ՀՀ իշխանութիւնների կողմից պատշաճ գնահատականի
Մայր Աթոռ Սուրբ Էջմիածինը խստօրէն դատապարտում է օրերս Ադրբեջանի նախագահի օգնական Հիքմեթ Հաջիեւի՝ Գանձասարի եւ Դադիվանքի վանական համալիրներ կատարած այցի ընթացքում վերջիններիս հայկական պատկանելիութիւնը ժխտող եւ իբրեւ աղուանական ներկայացնող յայտարարութիւնները եւ հայ ժողովրդի հոգեւոր-մշակութային ժառանգութեան նկատմամբ դրսեւորած հեգնական վերաբերմունքը։
Պատմական իրողութիւնների՝ քաղաքական նպատակայարմարութեամբ խեղաթիւրման այս փորձերը բացայայտ կեղծարարութիւն են եւ ոտնձգութիւն հայ ժողովրդի պատմական յիշողութեան ու հոգեւոր ժառանգութեան հանդէպ։ Այս գործելակերպն Ադրբեջանի իշխանութիւնների որդեգրած հայատեաց քաղաքականութեան անթաքոյց արտայայտութիւնն է։
Հերթական այս քարոզչական այցելութիւնը նպատակ ունի մոլորեցնելու միջազգային հանրութեանը։ Առանձնապէս ցաւալի եւ մտահոգիչ է այն հանգամանքը, որ պատմական կեղծիքների տարածմանը մասնակից են դարձւում Ադրբեջանում հաւատարմագրուած օտարերկրեայ դիւանագէտներ եւ միջազգային կառոյցների ներկայացուցիչներ։
Մայր Աթոռ Սուրբ Էջմիածինն ակնկալում է, որ վերջիններս պատշաճ գնահատական կը տան հայկական սրբավայրերի ինքնութեան խեղաթիւրմանը, Արցախի հոգեւոր-մշակութային ժառանգութեան նկատմամբ ոտնձգութիւններին, հայատեաց քաղաքականութեանը եւ իրենց մասնակցութեամբ չեն նպաստի հայկական պատմական ժառանգութեան իւրացման քաղաքականութեան արդարացմանը։
Հայաստանեայց Առաքելական Սուրբ Եկեղեցին բազմիցս ահազանգել է, որ Արցախի բռնի հայաթափումից յետոյ ադրբեջանական իշխանութիւնների կողմից վարւում է պատմական յուշարձանների իւրացման, հայկական սրբավայրերի, խաչքարերի ու գերեզմանոցների ոչնչացման, ինքնութիւնը փաստող վաւերագրերի վերացման քաղաքականութիւն, որի հերթական դրսեւորումն են Հաջիեւի յայտարարութիւնները։
Արցախի հայկական հոգեւոր-մշակութային ժառանգութեան նկատմամբ շարունակուող ոտնձգութիւնները պէտք է արժանանան ՀՀ իշխանութիւնների կողմից պատշաճ գնահատականի եւ դրանց կանխմանն ուղղուած գործուն քայլերի։
Մայր Աթոռը կոչ է անում բարեկամ պետութիւններին, միջազգային պատկան եւ ազգային կառոյցներին ամենայն ջանք ի գործ դնել՝ կանխելու քրիստոնէական հնագոյն հայկական ժառանգութեան հետագայ ոչնչացումն ու իւրացումը։
Տարածաշրջանում յարատեւ խաղաղութեան հաստատումը պահանջում է յարգանք ժողովուրդների հաւատքի, պատմական յիշողութեան եւ հիմնարար իրաւունքների նկատմամբ։ Արցախի հոգեւոր ժառանգութեան անխաթար պահպանութիւնը, այն կերտած Հայոց Եկեղեցու եւ ժողովրդի իրաւունքների իրացումը միջազգային անօտարելի պարտաւորութիւն է։
Մայր Աթոռ Սուրբ Էջմիածին
