Հոկտեմբերի 23-ին Թեհրանում Իրանի Իսլամական Հանրապետութեան նախագահ Էբրահիմ Ռայիսին ընդունել է ԱԳ նախարար Արարատ Միրզոյեանին:
Զրուցակիցները գոհունակութեամբ արձանագրել են, որ երկու հարեւան եւ բարեկամ երկրների միջեւ ձեւաւորուել է բարձր մակարդակի քաղաքական երկխօսութիւն՝ հիմնուած փոխադարձ յարգանքի եւ երկու ժողովուրդների հազարամեայ եղբայրութեան վրայ:
ԻԻՀ նախագահը եւ ՀՀ ԱԳ նախարարը կարեւորել են տարբեր ոլորտներում երկու երկրների փոխգործակցութեան խորացումը եւ այդ ուղղութեամբ պայմանաւորուածութիւնների իրականացման ուղղութեամբ գործուն քայլերի իրականացումը:
Էբրահիմ Ռայիսին եւ Արարատ Միրզոյեանը քննարկել են նաեւ տարածաշրջանային եւ միջազգային անվտանգութեանը վերաբերող հարցեր:
Կարեւորելով կովկասեան տարածաշրջանի անվտանգութիւնը տարածաշրջանի երկրների եւ ժողովուրդների համար՝ Ռայիսին օտարերկրեայ միջամտութիւնը վնասակար է համարել տարածաշրջանում խաղաղութեան ու կայունութեան համար եւ ասել է,-«Իրանի Իսլամական Հանրապետութիւնը, հաշուի առնելով իր հզօր եւ ազդեցիկ դիրքը, պատրաստ է օգնել Ադրբեջանին ու Հայաստանին լուծելու վէճերը»:
Նշելով,որ Իրանի Իսլամական Հանրապետութիւնը Կովկասեան տարածաշրջանի երկրների անվտանգութիւնը համարում է իր անվտանգութիւնը, եւ անդրադառնալով այս տարածաշրջանի երկրների միջեւ խաղաղութիւնն ու կայունութիւնը խաթարելու գործում ԱՄՆ-ի, Սիոնիստական ռեժիմի եւ արեւմտեան երկրների կործանարար դերին , Իրանի նախագահն ասել է,-«Այսօր Գազայում Սիոնիստական ռեժիմի յանցագործութիւնները եւ այդ յանցագործութիւններին ԱՄՆ-ի եւ նրա արեւմտեան դաշնակիցների կողմից ցուցաբերուող բացայայտ աջակցութիւնը դաս կարող են լինել բոլոր երկրների համար՝ իմանալու, որ այս գերիշխող պետութիւններն ու ռեժիմները երբեք իրենց իրական բարեկամները չէն կարող լինել»:
Դոկտոր Ռայիսին Գազայում այս օրերի իրադարձութիւնները համարել է տարածաշրջանի ժողովուրդների դէմ սիոնիստների ռասիստական եւ ապարտեիդի քաղաքականութեան դրսեւորում եւ Սիոնիստական օկուպանտ ռեժիմի հետ յարաբերութիւններ հաստատելու կոպիտ սխալի ապացոյց, որը երբեք չի ընդունուի ժողովուրդների կողմից:
Նշելով,որ Գազայում սիոնիստների յանցագործութեանն աջակցելու ԱՄՆ-ի քաղաքականութիւնը՝ Իրաք եւ Աֆղանստան զօրաշարժ կատարելու այս երկրի ձախողուած քաղաքականութեան շարունակութիւնն է , նախագահ Ռայիսին ասել է,-«Մենք վստահ ենք, որ այն, ինչ տեղի է ունենում այս օրերին Պաղեստինում, կաւարտուի ի շահ պաղեստինցիների»։
Այս հանդիպմանը Արարատ Միրզոյեանը, բարձր գնահատելով Իրանի Իսլամական Հանրապետութեան յստակ եւ ամուր դիրքորոշումները կովկասեան տարածաշրջանում տեղի ունեցող զարգացումների վերաբերեալ, ընդգծել է Իրանի առանցքայանութեամբ այս զգայուն ժամանակահատուածում տարածաշրջանի երկրների միջեւ հանդիպումների եւ քննարկումների անցկացման անհրաժեշտութիւնը:
Դատապարտելով խաղաղ բնակիչների, յատկապէս Գազայի կանանց եւ երեխաների վրայ յարձակուելու Սիոնիստական ռեժիմի յանցագործութիւնները՝ Հայաստանի արտաքին գործերի նախարարը յայտարարել է, որ Հայաստանի դիրքորոշումը Պաղեստինի ճնշուած ժողովրդի նկատմամբ համահունչ է Իրանի Իսլամական Հանրապետութեան դիրքորոշումներին։
Աղբիւր՝ «Փարսթուդէյ»
