Հայրապետիս յորդորն է ամենքիդ անխտիր առաջիկայ կիրակի մասնակցել ընտրութիւններին
Իշխանութիւնը փորձում է Եկեղեցին ենթարկեցնել իր կամքին. չենք ենթարկուելու որեւէ ճնշման. Վեհափառ
Վեհափառ հայրապետը նախքան այս հանդես էր եկել յայտարարութեամբ յառաջիկայ ընտրութիւնների մասին՝ «Յունիսի 7-ին՝ Սուրբ Էջմիածնի տօնի նուիրական օրը, մեր երկրում տեղի են ունենալու խորհրդարանական ընտրութիւնները։ Հայրապետիս յորդորն է ամենքիդ անխտիր առաջիկայ կիրակի մասնակցել ընտրութիւններին՝ ազգի եւ հայրենիքի շահերի բարձր գիտակցութեամբ, լուսաւոր գալիքի տեսիլքով եւ սերունդների նկատմամբ պատասխանատուութեամբ, որպէսզի մեր երկրում գերակայի օրէնքը, յարգուէն մարդու իրաւունքներն ու արժանապատուութիւնը, տիրապետէն արդարութիւնն ու ճշմարտութիւնը, սէրն ու համերաշխութիւնը եւ փոխադարձ յարգանքը՝ «դէ՛ն գցելով ամէն չարութիւն, ամէն նենգութիւն, կեղծաւորութիւններ, նախանձ եւ ամէն չարախօսութիւն»,- ինչպէս պատգամում է առաքեալը (Ա Պետ. 2.1)։
Կոչ ենք անում քաղաքական ուժերին զերծ լինել ատելութեան խօսքից, դրսեւորել զգօնութիւն ու շրջահայեացութիւն եւ հեռու պահել մեր ժողովրդին հնարաւոր անցանկալի զարգացումներից։ Մեր յորդորն է իրաւապահ համակարգի ներկայացուցիչներին անհրաժեշտ բոլոր պայմաններն ապահովել արդար ընտրութիւնների անցկացման եւ մեր հայրենակիցների ազատ կամարտայայտութեան համար։
Հայց ենք բարձրացնում առ Աստուած մեր հայրենիքի անսասանութեան ու վերազարթօնքի եւ աշխարհասփիւռ մեր ժողովրդի բարօրութեան համար։ Աղոթում ենք, որ Տիրոջ անբաւ ողորմութեամբ հայրենաբնակ մեր զաւակների նոր ընտրութիւնը ծառայի միմիայն ի բարին, ի սէր ազգիս ապահով, խաղաղ եւ առաջընթաց կեանքի»։
«Եկեղեցին միշտ էլ պատրաստ է իր իրաւունքները պաշտպանել եւ որեւէ կերպ որեւէ կառոյցի եւ իշխանութեան թոյլ չտալ, որ միջամտի Եկեղեցու ներքին կեանքին եւ փորձի Եկեղեցին ենթարկեցնել իր կամքին․
Իշխանութեան նպատակն է հեռացնել Հաեօց Հայրապետին: Այդքան դիւրին չէ Հայոց Հայրապետին հրաժարական պարտադրելը, եթէ նման գործողութեան դիմեն, ձերբակալեն Վեհափառին, մենք պէտք է ապաւինենք օրէնքին եւ արդարութեանը, որպէսզի արդարութիւնը յաղթի. մենք պատրաստ ենք յանձնառութեամբ կրելու այդ անարդար որոշումը. մենք շարունակելու ենք հաւատարիմ մնալ մեր ազգին ու ժողովրդին:
Հայոց Հայրապետի պաշտօնազրկումը ենթակայ չէ որեւէ իշխանութեան, որեւեւ անձի տնօրինման. այդ հարցերը քննարկւում են համապատասխան ատեաններում եւ կայացւում են համապատասխան որոշումներ: Չենք ենթարկուելու որեւէ ճնշման»,- Ամենայն Հայոց Կաթողիկոսը պատասխանում է լրագրողներին հարցերին:
Հարցազրոյցն ամբողջութեամբ՝ տեսանիւթում
