Էլիզաբեթ Չուլջեանի հարցազրոյցը «Ազատութեանը»
Ամերիկայի Հայ դատի գրասենեակն ամերիկեան իշխանութիւններին կոչ է անում ընդլայնել Արցախին յատկացուող աջակցութիւնը 2024 թուականին՝ այն հասցնելով 75 միլիոն դոլարի՝ հաշուի առնելով արդէն գրեթէ երեք ամիս ձգուող շրջափակումը, 2020-ի պատերազմի հետեւանքները։
ԱՄՆ Հայ դատի յանձնախմբի մամուլի քարտուղար Էլիզաբեթ Չուլջեանի փոխանցմամբ, արդէն յաջորդ շաբաթ ԱՄՆ Կոնգրեսը կը սկսի 2024-ի բիւջէի քննարկումները:
«Դժբախտաբար, Ամերիկայի արտգործնախարարութիւնը կտրել է մարդասիրական օժանդակութիւնը դէպի Արցախ, միայն մի փոքր բաժին է տրամադրում ականազերծման աշխատանքների համար։ Նկատի ունենալով շրջափակումը, հաշուի առնելով 2020-ի պատերազմը, նկատի ունենալով Ադրբեջանի կառավարութեան շարունակական ճնշումը եւ յարձակուողական կեցուածքն Արցախի հանդէպ, այդ գումարը պէտք է բարձրանայ», — «Ազատութեանը» փոխանցեց Չուլջեանը։
Միացեալ Նահանգներն այս տարուայ բիւջեով Հայաստանին 60 միլիոն դոլարի աջակցութիւն է նախատեսել՝ տնտեսական զարգացման, մասնաւոր հատուածի արդիւնաւետութեան, էներգէտիկ անվտանգութեան, ժողովրդաւարութեան եւ օրէնքի գերակայութեան ծրագրերի համար։
Բայդենի վարչակազմը 24 միլիոն դոլար էր նախատեսել նաեւ 2022-ի համար, սակայն Կոնգրեսն, ի վերջոյ, այդ գումարը կրկնապատկել էր՝ հասցնելով 45 միլիոն դոլարի, միաժամանակ, օրէնսդիրները նաեւ 2 միլիոն դոլար էին յատկացրել Արցախին՝ ականազերծման համար։
Հայ դատի յանձնախումբը կարծում է, որ ակնկալուող 75 միլիոն դոլարով հնարաւոր կը լինի նպաստել տեղահանուածների, Արցախի էներգէտիկ անվտանգութեան, կրթութեան, առողջապահութեան, սննդի, ինչպէս նաեւ ականազերծման խնդիրների լուծմանը։
«Ամերիկայի Հայ դատի յանձնախումբը արդէն սկսել է աշխատել թէ՛ կոնգրէսական ղեկավարների հետ, թէ՛ անշուշտ շարունակում ենք երկխօսութիւնը Ամերիկայի գործադիր մարմնի հետ, որպէսզի ընդլայնենք օժանդակութիւնը դէպի Արցախ եւ շարունակէնք օժանդակութիւնը դէպի Հայաստան, որ կարողանան Թուրքիայի եւ Ադրբեջանի շարունակական ճնշումները վերացնել», — ասաց Չուլջեանը։
Ի՞նչ ակնկալիքով է Հայ դատի գրասենեակը այսչափ մեծ գումար խնդրում ԱՄՆ իշխանութիւններից՝ հաշուի առնելով անցած տարիների կրճատումները, էլիզաբեթ Չուլջեանը պատասխանեց՝ այս դէպքում մատնանշում են Ադրբեջանի յարձակողական կեցուածքը, պարբերական ճնշումները Արցախի նկատմամբ։
