Մայր Աթոռ Սուրբ Էջմիածինը խստօրէն դատապարտում է «Քաղաքացիական պայմանագիր» կուսակցութեան նախընտրական ծրագրում Հայաստանեայց Առաքելական Սուրբ Եկեղեցու վերաբերեալ մերժելի դրոյթների ընդգրկումը։
Կուսակցութեան նախընտրական ծրագրում Եկեղեցու բարէնորոգման, կանոնադրութեան վերանայման, Ամենայն Հայոց Կաթողիկոսի հեռացման եւ կաթողիկոսական նոր ընտրութիւնների անցկացման պարտադրուող օրակարգի ամրագրումը սահմանադրական կարգի, Եկեղեցու ինքնակառավարման իրաւունքի, ինչպէս նաեւ խղճի ու կրօնի ազատութեան միջազգային հիմնարար սկզբունքների բացայայտ ոտնահարում է։
Եկեղեցու դէմ ակնյայտ ապօրինի գործողութիւնները շարունակելու նախընտրական խոստումներով եւս մէկ անգամ դրսեւորւում է իշխող քաղաքական ուժի գաղափարախօսութեան հակաեկեղեցական ողջ էութիւնը եւ նպատակը։
Հայաստանեայց Առաքելական Սուրբ Եկեղեցու հազարամեայ առաքելութիւնը, նրա սրբազան աւանդոյթներն ու հոգեւոր կեանքը չպէտք է քաղաքական շահարկումների առարկայ դառնան։ Ինչպէս քանիցս Մայր Աթոռը հաստատել է, կաթողիկոսի ընտրութիւնը եւ եկեղեցական անդաստանում որեւէ բարեկարգում բացառապէս հոգեւոր-կանոնական տիրոյթում են, ուստի եւ դուրս են քաղաքական կուսակցութիւնների եւ պետական իշխանութիւնների իրաւասութիւններից։
Որդեգրուած օրինախախտ գործելաոճն ազգավնաս է եւ բացարձակ անթոյլատրելի։ Այն հակասում է մեր աշխարհասփիւռ ժողովրդի շահերին, վտանգում ազգային արժեհամակարգի հիմերը եւ խաթարում հոգեւոր անվտանգութիւնը։
