Կոչ ենք անում խորհրդարանական մեծամասնութեանը դրսեւորել սթափութիւն եւ պատասխանատուութիւն
Հոկտեմբերի 9-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի նախագահութեամբ Մայր Աթոռ Սուրբ Էջմիածնում տեղի ունեցաւ Մայր Աթոռում պաշտօնավարող եպիսկոպոսների, հայաստանեան թեմակալ առաջնորդների եւ առաջնորդական տեղապահների ժողով։
Անդրադառնալով Հայոց Եկեղեցու դէմ ՀՀ իշխանութիւնների սանձազերծած ապօրինի արշաւին եւ այս շրջանակում Ազգային ժողովում նախաձեռնուած գործընթացներին՝ ժողովականները հանդէս եկան յայտարարութեամբ․
«Մեր վճռական անհամաձայնութիւնն ենք յայտնում Հայաստանի վարչապետի հակաեկեղեցական գործողութիւնների ուղղորդման ներքոյ՝ ՀՀ Ազգային ժողովի կողմից Հայաստանեայց Առաքելական Սուրբ Եկեղեցում այսպէս կոչուած ճգնաժամի ուսումնասիրման քննիչ յանձնաժողովի ստեղծման առնչութեամբ։ Այս նախաձեռնութիւնը հերթական անգամ ոտնահարում է կրօնական ազատութեան եւ Եկեղեցու ինքնավարութեան միջազգայնօրէն ճանաչուած հիմնարար սկզբունքները, որով լրջօրէն կասկածի տակ է դրւում երկրում օրէնքի գերակայութիւնը։
Իշխող քաղաքական ուժն ապօրինի բոլոր միջոցների կիրառմամբ, բռնաճնշումներով եւ եկեղեցական գործունէութեան արհեստական խոչընդոտմամբ փորձեր է կատարում միջամտելու Հայոց Եկեղեցու ներքին կեանքին ու ինքնակառավարմանը։
Խորապէս մտահոգիչ է, որ ապօրինութեան հարթակի է վերածւում նաեւ Ազգային ժողովը, որի բարձր ամբիոնը ծառայեցւում է հակաեկեղեցական տրամադրութիւնների սերմանման, Եկեղեցու եւ եկեղեցականների դէմ ատելութեան, անհիմն մեղադրանքների ու վիրաւորանքների տարածման համար։ Ստեղծուած քննիչ յանձնաժողովին վերապահուել են օրէնքով չնախատեսուած լիազօրութիւններ եւ իրաւասութիւններ՝ Եկեղեցու կանոնական իրաւասու մարմինների փոխարէն որոշելու Եկեղեցու ներքին կեանքին եւ կառավարմանը վերաբերող տարբեր հարցերի կանոնական պատշաճութիւնը։
Կոչ ենք անում խորհրդարանական մեծամասնութեանը դրսեւորել սթափութիւն եւ պատասխանատուութիւն, գործել բացառապէս սահմանադրական լիազօրութիւնների շրջանակում։ Մեր պահանջն է պետական իշխանութեամբ օժտուած՝ մեր Սուրբ Եկեղեցու իւրաքանչիւր զաւակից զերծ մնալ անօրինական որեւէ գործողութիւնից, հրաժարուել իշխանական դիրքի չարաշահումից։ Որեւէ կերպ արդարացուած չեն Եկեղեցու ներքին կեանքի հանդէպ քաղաքական վերահսկողութիւն հաստատելու կամ եկեղեցական կանոնական մարմինների լիազօրութիւնները իւրացնելու փորձերը։
Ի սկզբանէ կեղծիքներով, զրպարտութիւններով ու մոլորութիւններով հիմնաւորուած այս գործընթացն անխուսափելիօրէն բացասական ներգործութիւն է ունենալու ազգային կեանքում, առաջ է բերելու նոր պառակտումներ, հասարակութեան մէջ տեղիք է տալու թշնամանքի ու անհանդուրժողականութեան։ Մինչդեռ հայրենի երկրի առջեւ ծառացած ներքին եւ արտաքին մարտահրաւէրները պարտաւորեցնում են ամենքիս լինել միասնական, համերաշխ եւ հաստատակամ։ Յորդորում ենք մեր Սուրբ Եկեղեցու զաւակներին պահպանել հոգեւոր զգօնութիւնն ու աղօթական հանդարտութիւնը եւ հակաեկեղեցական մերժելի այս երեւոյթների հանդէպ իրենց դիրքորոշումն արտայայտել միմիայն արժանապատիւ ու օրինական եղանակներով։
Մայր Աթոռ Սուրբ Էջմիածինը վճռականօրէն հետամուտ է լինելու օրինական բոլոր միջոցներով պաշտպանելու Հայոց Եկեղեցու եւ իր հաւատացեալ հօտի իրաւունքները։
Թող Երկնաւոր Տէրը խաղաղ եւ անվրդով պահի Հայաստան աշխարհը, համախումբ՝ հաւատաւոր մեր ժողովրդին, անսասան՝ Մայր Աթոռ Սուրբ Էջմիածինն իր բոլոր կառոյցներով ի սփիւռս աշխարհի։ Իմաստութիւն, հաւատ եւ յուսառատութիւն ամենքիս՝ արժանապատուօրէն յաղթահարելու մերօրեայ փորձութիւնները»։
