Միացեալ Նահանգներու արտաքին գործոց նախարարութիւնը հաղորդագրութիւն հրապարակած է` ողջունելով Հայաստանի Հանրապետութեան վարչապետի աշխատակազմի եւ Ազրպէյճանի նախագահի վարչակազմի միացեալ յայտարարութիւնը, որուն համաձայն Ազրպէյճան ազատ կ՛արձակէ 32 հայ զինուորներ, իսկ Հայաստանը` 2 ազրպէյճանցի զինուորներ:
«Միացեալ Նահանգներ կ՛ողջունեն Հայաստանի եւ Ազրպէյճանի ղեկավարներու միացեալ յայտարարութիւնը 2 ազրպէյճանցի եւ 32 հայ կալանաւորներու ազատ արձակման մասին:
«Այս յանձնառութիւնը վստահութեան ամրապնդման կարեւոր միջոց է խաղաղութեան համաձայնագիրի աւարտի եւ յարաբերութիւններու կարգաւորման աշխատանքներու լոյսին տակ:
«Մենք կ՛ողջունենք Ազրպէյճանի նախագահ Ալիեւն ու Հայաստանի վարչապետ Փաշինեանը` Հարաւային Կովկասի ժողովուրդին համար աւելի խաղաղ եւ բարգաւաճ ապագայի հիմեր ստեղծելու միացեալ ջանքերուն համար», նշուած է Միացեալ Նահանգներու արտաքին գործոց նախարարութեան հաղորդագրութեան մէջ:
Կը նշուի նաեւ, որ Միացեալ Նահանգներ պիտի շարունակեն ուժեղ կերպով աջակցիլ տեւական եւ արժանապատիւ խաղաղութեան հասնելու ջանքերուն:
Յիշեցնենք, որ Հայաստանի Հանրապետութեան վարչապետի աշխատակազմի եւ Ազրպէյճանի նախագահի վարչակազմի միացեալ յայտարարութիւնը հրապարակուած էր 7 դեկտեմբերի երեկոյեան, իսկ աւելի ուշ ազրպէյճանական լրատուամիջոցները հրապարակած էին նաեւ ազատ արձակուած հայ զինուորներուն անունները:
