Այսօր՝ Երեւանի մէջ տեղի ունեցած հանդիսաւոր միջոցարման ընթացքին, Հայաստանի Հանրապետութեան երկրորդ նախագահ Ռոպերթ Քոչարեան պաշտօնապէս յայտարարուեցաւ որպէս «Հայաստան» դաշինքի վարչապետի թեկնածուն։ Իր ելոյթին մէջ Քոչարեան շեշտեց, որ իրենք տրամադրուած են վճռականօրէն եւ իրենց միակ նպատակը յաղթանակն է։ Ան վստահութիւն յայտնեց, որ «չարը մարմնաւորող իշխանութիւնը պիտի պարտուի»։
Յայտարարութեամբ հանդէս եկաւ նաեւ ՀՅԴ Հայաստանի Գերագոյն Մարմնի ներկայացուցիչ եւ ԱԺ պատգամաւոր Իշխան Սաղաթելեանը, որ տեղեկացուց, թէ Ռոպերթ Քոչարեան յառաջիկայ յունիս 7-ի խորհրդարանական ընտրութիւններուն պիտի մասնակցի «Հայաստան» դաշինքով, որուն առանցքային մաս կը կազմեն Հայ Յեղափոխական Դաշնակցութիւնը եւ «Առաջ» կուսակցութիւնը։ Սաղաթելեան իր խօսքին մէջ յատուկ շեշտադրեց դաշինքի ամրութիւնը՝ նշելով, որ իրենց սխալները պայքարողի սխալներ են եւ ոչ թէ դաւաճանի կամ անտարբեր դիտորդի, քանի որ անսխալական միայն ան, որ ոչինչ կ’ընէ։ Ան ընդգծեց, որ այս միաւորումը սոսկ նախընտրական համախմբում չէ, այլ Հայաստանի ճակատագրով մտահոգ ուժերու ջանքերու մեկտեղում՝ հայկական ինքնութիւնը պահելու եւ անվտանգ հայրենիք վերակերտելու նպատակով։
Անդրադառնալով ներկայիս ստեղծուած կացութեան՝ Սաղաթելեան յայտարարեց, որ իրենց առաջարկը ոչ թէ հաւերժական պատերազմն է, այլ արժանապատիւ կայունութիւնը։ Ան շեշտեց, որ իրենք չեն գար պատերազմ բերելու, այլ կու գան զայն կանխելու, երկրի տարածքային ամբողջականութիւնը պաշտպանելու եւ ինքնիշխանութիւնը վերականգնելու համար։ Դաշինքը հրապարակեց նաեւ իր նախընտրական կարգախօսը՝ «Միասին կարող ենք», կոչ ուղղելով ժողովուրդին միասնաբար հեռացնելու գործող վարչախումբը եւ կառուցելու մրցունակ ու անվտանգ պետութիւն մը՝ հիմնուած ազգային արժէքներու եւ հզօր տնտեսութեան վրայ։
Իշխան Սաղաթէլեանի ելոյթը ընդմիջուեցաւ տեսաշարով, ուր ներկայացուեցաւ «Հայաստան» դաշինքի անցած քաղաքական պայքարի ճանապարհը։
Քրիստինէ Վարդանեան խօսեցաւ երիտասարդութեան հետ կապուած դաշինքի ծրագիրներուն մասին՝ նշելով, որ այդ ծրագիրներուն մէջ առաջնահերթ տեղ կը գրաւէ հանրապետութեան մէջ բարձրագոյն կրթութիւնը անվճար դարձնելը։
Արթուր Խաչատրեան ներկայացուց «Հայաստան» դաշինքի տնտեսական քաղաքականութեան հիմնական 12 ուղղութիւնները։
Աննա Գրիգորեան յայտարարեց, որ «Հայաստան» դաշինքի վարչապետի թեկնածուն Հայաստանի Հանրապետութեան երկրորդ նախագահ Ռոբերթ Քոչարեանն է, որ բեմ բարձրանալով ըսաւ․ «Մենք վճռական ենք, մեր նպատակը յաղթանակն է։ Չարիքը, որ կը մարմնաւորէ այս իշխանութիւնը, պիտի պարտուի։ Ես անոնց դէմ պայքարի մէջ մտած եմ անոնց իշխանութեան գալու առաջին իսկ օրերէն եւ չեմ հանգստանար, մինչեւ որ անոնք չհեռացուին։ ․․․Բայց ասիկա բաւարար չէ։ Պէտք է պատասխանատուութեան ենթարկուին անոնք, որոնք պատասխանատու են մեր հազարաւոր հերոսներու մահուան համար, որոնք յանձնեցին Արցախը եւ այսօր կը ստիպեն ժողովուրդը մոռնալ իր հերոսական պատմութիւնը»։
Նշենք, որ 2026 թուականի 7 Յունիսին կայանալիք ընտրութիւններուն «Հայաստան» դաշինքը պիտի մասնակցի «Միասին կարող ենք» կարգախօսով։
