ՀՅԴ Լիբանանի հայ դատի մարմինի հաղորդագրութիւնը Պիլալ Էրտողանի Լիբանան այցելութեան վերաբերեալ

ՀՅԴ Լիբանանի հայ դատի մարմինի հաղորդագրութիւնը Պիլալ Էրտողանի Լիբանան այցելութեան վերաբերեալ

ՀՅԴ Լիբանանի Հայ դատի մարմինը Թուրքիոյ նախագահ Ռեճեփ Թայիփ Էրտողանի որդիին` Պիլալ Էրտողանի վերջերս Լիբանան կատարած այցելութեան վերաբերեալ հրապարակեց «Յիշողութեան, արժանապատուութեան եւ չմոռնալու պարտաւորութեան մասին» խորագիրը կրող արաբերէն հաղորդագրութիւն մը: Ստորեւ հաղորդագրութեան թարգմանութիւնը.

«Լիբանանը յիշողութեամբ կերտուած երկիր մըն է: Անոր լեռներն ու գիւղերը տակաւին իրենց մէջ կը պահեն 1915-1918 թուականներու Մեծ սովի պատմութիւնը: Այդ տարիներուն, կանխամտածուած շրջափակումը եւ օսմանեան իշխանութիւններուն վարած քաղաքականութիւնը սովամահութեան մատնեցին Լեռնալիբանանի բնակչութեան մեծ մասը: Ամբողջ ընտանիքներ անհետացան, իսկ գիւղեր ամայացան: Լիբանանցի մեծ հայրերն ու մեծ մայրերը այս պատմութիւնները սերունդէ-սերունդ փոխանցեցին, որպէսզի ժողովուրդը երբեք չմոռնայ հպատակեցման գինը:

«Այսօր ականատես կ՛ըլլանք տեսարաններու, որոնք իրաւացի հարցադրումներ կը յառաջացնեն, եւ լիբանանցի ժողովուրդը արժանի է պատասխաններ ստանալու:

«Լիբանանի պատասխանատուները ի՞նչ պաշտօնական հանգամանքով կ՛ընդունին պետական պաշտօն չունեցող անձեր, պարզապէս իրենց հայրերուն ինքնութեան պատճառով: Ե՞րբ ընտանիքի ծագումնաբանութիւնը սկսաւ փոխարինել դիւանագիտական արարողակարգն ու պետութեան արժանապատուութիւնը:

«Ի՞նչ պատգամ կը փոխանցուի լիբանանցի ժողովուրդին` իր հաստատութիւններուն արժէքին եւ անոնց գերիշխանութեան մասին:

«Ինչպէ՞ս կրնան Լեռնալիբանանի մէջ սովամահ եղածներուն ժառանգորդները այսքան դիւրութեամբ իրենց դռները բանալ անոնց առջեւ, որոնք տակաւին կը ժխտեն անցեալի ոճիրները եւ կը մերժեն զանոնք ճանչնալ:

«Արդեօք Լիբանանի յիշողութիւնը այնքա՞ն կարճ դարձած է, որ այլեւս չի յիշեր իր ժողովուրդին ապրած սովը, կամ այն ցեղասպանութիւնը, որուն հետեւանքով հարիւր հազարաւոր վերապրողներ ապաստան գտան իր ափերուն:

«Եւ վերջապէս, արդեօք Լիբանանը, որ մայիս 6-ը ընդհանուր նահատակներու նուիրուած յիշատակման օրէն վերածած է «մամուլի նահատակներու» յատուկ յիշատակի օրուան, դէպի ազատ, գերիշխան եւ արժանապատիւ ապագա՞յ կ՛ուղղուի, թէ՞ կը վերադառնայ մութասարիֆութեան ժամանակաշրջան:

«Մինչ ոմանք կը նախընտրեն մոռնալ իրենց պատմութիւնը, մենք չենք մոռնար: Հաստատ կը մնանք մեր սկզբունքներուն, մեր նահատակներուն յիշատակին եւ ճշմարտութեան: Մեզ առաջնորդողը վրէժխնդրութիւնը չէ, այլ արդարութիւնը, ճանաչումն ու արժանապատուութիւնը:

«Լիբանանի մայրաքաղաքն իսկ այս յանձնառութեան յստակ օրինակը տուաւ: Պէյրութի Էշրեֆիէ թաղամասին մէջ վերջերս պաշտօնապէս բացուեցաւ նահատակ Սուրբ Իգնատիոս Մալոյեանի անունը կրող փողոց մը:

«Ա՛յս է մեր ճանչցած եւ հաւատացած Լիբանանը. Լիբանան մը, որ կը յարգէ իր նահատակները, կը պահպանէ իր յիշողութիւնը եւ իր արժանապատուութիւնը չի փոխանակեր անցողիկ ժեստերու հետ:

«Լիբանանի Հայ դատի մարմինը պիտի շարունակէ պաշտպանել պատմական ճշմարտութիւնն ու արդարութեան դատը: Լիբանանի պատասխանատուներուն կոչ կ՛ուղղենք` յարգելու իրենց ժողովուրդին յիշատակը եւ հայ ու լիբանանցի նահատակներուն զոհողութիւնները»:

Share