«Հրապարակի» զրուցակիցն է «Հայաստան» խմբակցութեան պատգամաւոր Քրիստինէ Վարդանեանը։
— «Հայաստան» խմբակցութեան երեք պատգամաւորներ՝ Վահէ Յակոբեանը, Հռիփսիմէ Ստամբուլեանը եւ Ելենայ Կիրակօսեանը, յայտարարեցին մանդատները վայր դնելու մասին։ Կարծիքներ կան, որ ձեր խմբակցութիւնը փլուզւում է, խորհրդարանական ընդդիմութիւնը քայքայւում է։ Հիմնաւո՞ր է դա։
— Խորհրդարանական մանդատները վերցնելու առաջին օրուանից լուրեր են տարածուել դաշինքի պառակտման վերաբերեալ, ինչ-որ մեկնաբանութիւններ են եղել։ Մինչեւ այս պահը մենք նման որեւէ բան չենք տեսնում։ Հիմա տարածուել է «Վերածնուող Հայաստան» կուսակցութեան ներկայացուցիչների յայտարարութիւնը, որտեղ նաեւ նշուած են մանրամասները, որ կուսակցութեան ներկայացուցիչներն այս պահին դադարեցնում են իրենց խորհրդարանական գործունէութիւնը։ Իմ գործընկերները մեկնաբանելու են իրենց որոշման պատճառները։ Ես նաեւ պէտք է ասեմ, որ քննարկում այդ մասին եղել է, տեղեկացուած եղել ենք։ Վերաբերւում եմ մեծ յարգանքով, ընկալումով, որովհետեւ իրենք հիմնաւոր բացատրել են իրենց որոշման հիմքերը։ Նշեմ նաեւ, որ բոլոր գնահատականները եւ գործունէութեան ուղղութիւնը մնում են նոյնը։ Ես ամենակարեւորն այս ընթացքում ե՛ւ ինձ համար, ե՛ւ իմ թիմակիցների համար համարել եմ բուն նպատակից չշեղուելը՝ նպատակն է, որ պիտի լինի անփոփոխ։ Դեպի նպատակ գնալու ճանապարհին մարտաւարութեան փոփոխութիւնը, գործիքակազմերի փոփոխութիւնն ինձ համար որեւէ խնդիր երբեք չի եղել։
— Արդյօք դա չի՞ սասանի խմբակցութեան հիմքերը։
— Խմբակցութիւնը հիմնուած է գնահատականների վրայ, եւ երեք ուժերն ու մարդիկ հաւաքուել են այդ գնահատականների շուրջ՝ ստանձնելով, յանձնառելով՝ պայքարել այս իրավիճակը փոխելու համար։ Խմբակցութեան հիմքերը կարող են սասանել միայն հրաժարումն այդ սկզբունքներից եւ հրաժարումը պայքարից։ Ես նման որեւէ տեղեկութիւն ոչ միայն չունեմ, այլ նաեւ որեւէ նախանշան չեմ տեսնում։ Եթէ Դուք նկատի ունեք՝ արդյօք թուլանո՞ւմ է խմբակցութիւնը, թէ ոչ, իմ գործընկերներն արդէն ասել են, որ անփոխարինելի մարդիկ չկան, այդ թւում՝ նաեւ ես։ «Հայաստան» դաշինքն ունի ցանկ, եւ եթէ մէզնից որեւէ մէկը որոշում է մանդատը վայր դնել, որոշում է այլ տեսակի գործունեութեամբ զբաղուել՝ իրեն փոխարինելու է գալիս յաջորդը։ Սա առաջին դէպքը չէ խմբակցութեան պարագայում, մենք իսկապէս ապրում ենք ծանր ժամանակաշրջան, եւ այս ընթացքում էլի են նման դէպքեր եղել, իրենց փոխարինել են նոր պատգամաւորներ եւ այս դէպքում էլ կփոխարինէն նոր պատգամաւորներ, ու արդէն գործունէութիւնը կը կարողանանք գնահատել, երբ այդ պատգամաւորները կը սկսէն գործունէութիւն ծաւալել։
— Խմբակցութեան կազմում գտնուող քաղաքական ուժերի յարաբերութիւնները լա՞վ են, պարբերաբար տեղեկութիւններ են պտտւում, թէ լուրջ տարաձայնութիւններ կան։
— Աշխատանքային յարաբերութիւններ են, աշխատանքային քննարկումներ եւ գործնական յարաբերութիւններ։ Եթէ նկատի ունեք սկզբունքային տարաձայնութիւններ, միանշանակ կարող եմ ասել, որ ոչ։ Տարբեր հայեացքների շուրջ տարբեր տեսակէտներ, բնականաբար, կան, որովհետեւ, ի տարբերութիւն իշխանական թեւի ներկայացուցիչների, այստեղ հաւաքուած են կարծիք, տեսակէտներ, սկզբունքներ ունեցող ու դրանք պաշտպանող, կարմիր գծեր ունեցող մարդիկ։ Հետեւապէս, տարբեր հարցերի նկատմամբ կան տարբեր կարծիքներ։ Սկզբունքային տարաձայնութիւններ՝ այս իշխանութեան նկատմամբ գնահատականի փոփոխութիւն չկայ։
