«Հակեկեղեցական արշաւը խրախուսւում է մի շարք արտաքին ուժերի կողմից»
Գեւորգ Դանիելեան
Որեւէ ընտրութեան արդիւնք չի կարող հիմք լինել՝ Վեհափառին հրաժարական պարտադրելու ասել է Գերագոյն հոգեւոր խորհրդի իրաւագէտ անդամ Գեւորգ Դանիելեանը:
Վաղարշապատ համայնքի ընտրութիւններում «Քաղաքացիական պայմանագրի» թեկնածուի յաղթանակը ոգեւորել է Նիկոլ Փաշինեանին հայ ըլըղեցու դէմ իր ծրագրի շրջանակում: Փաշինեանն այսօր վաղ առաւօտեան ֆեյսբուքեան իր գրառման մէջ նաեւ արձանագրել է՝ հէնց վաղարշապատցիները իրենց ընտրութեամբ լիցքաւորեցին Վեհարանը ազատագրելու իր գործընթացը. «Ձեր ընտրութեամբ կարեւոր լիցք տուեցիք մեր սրբութեան սրբոցը՝ Մայր Աթոռ Սուրբ Էջմիածինը Կտրիճ Ներսիսեանից ազատելու գործընթացին»։
Մայր Աթոռի Գերագոյն հոգեւոր խորհրդի աշխարհիկ անդամ, իրաւագիտութեան դոկտոր, պրոֆէսոր Գեւորգ Դանիելեանը հակադարձում է վարչապետ Փաշինեանին՝ «որեւէ ընտրութեան արդիւնք չի կարող դիտարկուել իբրեւ եկեղեցու ինքնավարութեանը միջամտելու գործօն»: Գեւորգ Դանիելեանը 2007-ից 2010 թուականներին եղել է ՀՀ արդարադատութեան նախարար:
«Անգամ քաղտեխնոլոգիայի հնարքների տեսանկիւնից այդ երկու երեւոյթների միջեւ որեւէ աղերս արձանագրելը, կարծում եմ, իմաստազուրկ է», — «Ազատութեան» հետ զրոյցում ասել է նա:
Գեւորգ Դանիելեանը նաև ընդգծել է՝ պատահական չէ, որ Գարեգին Երկրորդը համարւում է Ամենայն Հայոց կաթողիկոս, որի ընտրութեանը Ազգային եկեղեցական ժողւում պարտադիր մասնակցում են ոչ միայն Հայաստանի, այլեւ ողջ Սփիւռքի հոգեւոր դասից եւ աշխարհիկ հատուածից ընտրուած 500-ից աւելի փոխանորդներ:
«Ոչ միայն որեւէ համայնքի, այլեւ անգամ համապետական ընտրութիւնների ցանկացած արդիւնք, անկախ դրա ձեռքբերման հնարքներից, սկզբունքօրէն չի կարող դիտարկուել իբրեւ հայ եկեղեցու ինքնավարութեան դէմ արշաւին առնչուող անմիջական գործօն, իբրեւ պետութեան կողմից իրաւապահ համակարգի ներգրաւմամբ կրօնական կազմակերպութեան ինքնավարութեանը միջամտելն արդարացնող միջոց», — ասել է նա:
Անդրադառնալով Փաշինեանի եւ իշխող թիմի կողմից պարբերաբար հնչող այն բացատրութեանը, թէ իրենց արշաւը ոչ թէ եկեղեցու, այլ կաթողիկոսի դէմ է, քանի որ վերջինս խախտել է կուսակրօնութեան ուխտը, Գերագոյն հոգեւոր խորհրդի անդամը պարզաբանում է՝ իւրաքանչիւր կրօնական կառոյց ունի իր կանոնադրական հիմքերը, եւ երբ փորձ է արւում որեւէ հոգեւորականի նկատմամբ, անկախ նրա զբաղեցրած դիրքից, աշխարհիկ պահանջներ ներկայացնել, ապա դա ոչ թէ տուեալ եկեղեցականի, այլ այդ կրօնական կազմակերպութեան կանոնադրական իրաւական հիմքերի դէմ է:
«Այսինքն՝ դուք դա անտեսում եք, ամբողջ կրօնական կառոյցի կարգավիճակը, նրա ինքնավարութիւնը, յետոյ ասում եք՝ գիտեք, ես խնդիր չունեմ կրօնական կառոյցի հետ, դա առանձին խնդիր է, բայց դրանք փոխկախուած են, չէ՞ որ ամէն մի կրօնական կազմակերպութիւն ունի իր կանոնադրական հիմքերը, եւ իւրաքանչիւր ոչ նախապէս կամ նախապէս ծանօթանում է, ընդունում է այդ բոլորը, դառնում է հաւատացեալ, իսկ եթէ չի ընդունում, ապա դրանից եղանակներ կան, բայց ոչ աշխարհիկ եղանակով պահանջներ ներկայացնելը՝ ներգրաւելով ուժային կառոյցներին», — ընդգծեց Դանիելեանը:
Գերագոյն հոգեւոր խորհրդի անդամ Գեւորգ Դանիելեանը նկատում է՝ իշխող կուսակցութեան թեկնածուն, որ ամենաշատ ձայները ստացաւ, քարոզարշաւի ընթացքում իրեն թոյլ չի տուել հայ եկեղեցու ինքնավարութեանը վերաբերող որեւէ յայտարարութիւն: Մինչդեռ Վեհափառի հասցէին արուած ձեւակերպումներում իրեն անկաշկանդ պահող մէկ այլ թեկնածու անգամ անցողիկ շեմը չյաղթահարեց:
«Եթէ, այնուամենայնիւ, բացայայտ քարոզարշաւի ընթացքում, կամ ինչպէս Դուք հարց ձեւակերպեցիք, ծրագրի մէջ ներառուեին կոնկրէտ եկեղեցու կամ Վեհափառի դէմ ուղղուած քայլեր, ապա արդիւնքներն այլ կը լինէին, իսկ եթէ այլ լինէր, ուրեմն ի՞նչ է, մենք պէտք է եզրակացնենք, որ պէտք է հէնց միայն այդ հիմքով ամէն ինչ դադարեցուեր», — նշել է նա:
Դանիելեանի խօսքով՝ համայնքային, թէ համապետական ընտրութիւն, անկախ իր արդիւնքներից չի կարող հիմք դառնալ եկեղեցու դէմ քայլեր ձեռնարկելու համար: Իսկ թէ արդեօք վարչապետ Փաշինեանի այսօրուայ յայտարարութիւնից յետոյ Մայր Աթոռի դէմ արշաւն էլ աւելի կահագնանայ, Գերագոյն հոգեւոր խորհրդի անդամ Գեւորգ Դանիելեանը միայն յայտարարութեան հիման վրայ եզրահանգումներ չի ուզում անել, բայց պնդում է՝ իշխանութեան հակեկեղեցական արշաւը զուտ ներազգային, ներքաղաքական զարգացումների արդիւնք չէ:
«Ակնյայտ երեւում է, որ սա միայն ներազգային չէ, ինչ չափով, ինչ եղանակով է այդ ազդեցութիւն լինում, այդ հարցին պատասխանելու համար մենք պէտք է ունենանք արդէն այլ տուեալներ: Առայժմ մեր ձեռի տակ եղած փաստական տուեալները անթաքոյց խօսում են այն մասին, որ ցաւօք, հակաեկեղեցական այս շարժումը ձեռնտու է կամ խրախուսւում է մի շարք այլ արտաքին ուժերի կողմից», — կարծիք յայտնեց նա:
