Հայկ Դեմոյեան
«Համաշխարհային հայկական երրորդ գագաթնաժողով» ճոռոմաբանութեան անուան տակ ՔՊ-ականները շարունակում են իրենց յանցաւոր գործունէութիւնը՝ սպասարկող եւ իբր Սփիւռքը ներկայացնող որոշ անյայտ դէմքերի միջոցով զուգահեռ սփիւռքեան կառոյցներ ստեղծելու ուղղութեամբ։ Անփառունակ ու դատապարտուած ջանքեր…
Իրական Սփիւռքում, այլ ոչ թէ Փաշինեանի երեւակայած Սփիւռքի կոոպերատիւում, այս դասերը վաղուց են սերտել, երբ խորհրդային դեսպանատների եւ դրանց կցուած հայազգի երկրորդ ու երրորդ քարտուղարների միջոցով հաւաքագրւում էին Խորհրդային Միութեանը հաւատարիմ, բայց համայնքներում մերժուած թեկնածուներ։
Եւ ինչպէս բնորոշ է վաղ կոոպերատիւ շարժմանը, «Նիկոլի Սփիւռքը» կը գործի նկուղային պայմաններում ու հէնց այնտեղ էլ կը գտնի իր վախճանը։
Գալով լուացքատանը՝ պէտք է ուշադրութիւն հրաւիրեմ այն հանգամանքի վրայ, որ COP17-ից յետոյ նոյն վայրում «խնայողաբար» միմեանց յաջորդող լայնածաւալ միջոցառումների կազմակերպումը լուրջ կոռուպցիոն ռիսկեր է պարունակում՝ հետեւեալ սխեմայի հնարաւոր կիրառմամբ։
Առաջին միջոցառման համար նախատեսուած բիւջէի սահմաններում իրականացւում են բոլոր ծախսերը, իսկ յաջորդող երկրորդ ու երրորդ միջոցառումների համար յատկացուած ֆինանսական միջոցները ձեւակերպւում են առաջինի հաշուին, եւ այս կերպ պետական բիւջէից իւրացւում է ահռելի չափի գումար։
Հարցրէք, թէ որքա՞ն է ծախսուել գագաթնաժողովի կազմակերպման համար, ապա դրա առնուազն 70 տոկոսը կը լինի զուտ իւրացուած գումարը։ Բայց կասկած չունենաք, որ թղթերով ամէն ինչ ճիշտ է լինելու։
Եթէ ունենայինք իսկապէս անկախ լրատուամիջոցներ, ապա պարզ լրագրողական հետաքննութեան արդիւնքում շատ ու շատ մանրամասնութիւններ կը բացայայտուէին բիւջէի համատարած թալանի նաեւ այս դրուագների կապակցութեամբ։
Իսկ ՔՊ-ական հերթական խեղկատակութեանը մասնակցած սփիւռքահայերի հասցէին հիմնական երկու մեղադրանքները սրանք են՝ աջակցութիւն Նիկոլ Փաշինեանի գլխաւորութեամբ Հայոց ցեղասպանութեան պատմական փաստը կասկածի տակ դնելու ջանքերին եւ Արցախը հայաթափելու ցեղասպանական գործարքին։
Հ.Գ. Մտէք Սփիւռքի գործերի գլխաւոր յանձնակատարի գրասենեակի ֆէյսբուքեան էջն ու արձագանգների քանակով եւ բովանդակութեամբ լիարժէք պատկերացում կը կազմէք «գագաթնաժողովի» նկատմամբ իրական հետաքրքրութեան մասին։
