ՀՅԴ Բիւրոյի անդամ, Լիբանանի խորհրդարանի պատգամաւոր եւ Միջին Արեւելքի հարցերով պատասխանատու Յակոբ Բագրատունին AlphaNews-ի հետ զրոյցում նշել է, որ տարածաշրջանում հրադադարի ընկալումն այսօր փոխուել է. Լիբանանում հրադադարը դեռեւս չի նշանակում յարձակումների լիակատար դադար։
«Հրադադար ասելով՝ մենք հասկանում էինք փոխադարձ յարձակումների եւ թիրախաւորումների դադարեցում, սակայն, ըստ երեւոյթին, այժմ նոր ընկալում է ձեւաւորուել․ նոյնիսկ հրադադարի պայմաններում յարձակումները շարունակւում են, պարզապէս՝ աւելի փոքր ծաւալով»,– ասել է նա։
Անդրադառնալով բանակցութիւններին՝ Բագրատունին նշել է, որ գործընթացն ընթանում է երկու ուղղութեամբ՝ ԱՄՆ-ի եւ Իրանի միջեւ, ինչպէս նաեւ Լիբանանի քաղաքական ու ռազմական պատուիրակութեան եւ Միացեալ Նահանգների միջեւ, ինչը երկրի պատմութեան մէջ աննախադէպ երեւոյթ է։ Նրա խօսքով՝ արդէն կան որոշ պայմանաւորուածութիւններ, սակայն պահպանւում են նաեւ չյստակեցուած հարցեր, այդ թւում՝ դեռեւս չհրապարակուած անվտանգային համաձայնագիրը։
«Տակաւին վաղ է յստակ եզրակացութիւններ անել, քանի որ լիբանանեան հասարակութեան եւ քաղաքական ուժերի միջեւ լուրջ տարաձայնութիւններ կան»,– ընդգծել է պատգամաւորը՝ յաւելելով, որ համաձայնագիրը պէտք է ստանայ թէ՛ նախարարների խորհրդի, թէ՛ խորհրդարանի հաւանութիւնը։
Նա նաեւ նշել է, որ Միացեալ Նահանգները հանդէս է գալիս որպէս պայմանաւորուածութիւնների երաշխաւոր, սակայն «Հեզպոլլահ»-ը եւ մի շարք քաղաքական ուժեր դէմ են առաջարկուող համաձայնագրին։
Մանրամասները՝ տեսանիւթում։
