ՍՏԵՓԱՆԱԿԵՐՏ, 26 ՄԱՅԻՍԻ, ԱՐՄԵՆՊՐԵՍ: Արցախի Հանրապետութեան նախագահ Արայիկ Յարութիւնեանն ստորագրել է հրամանագրեր ռազմական դրութեան պայմաններում կիրառուող լրացուցիչ սահմանափակումների մասին:
Ինչպէս «Արմենպրես»-ին տեղեկացրին Արցախի Հանրապետութեան նախագահի աշխատակազմից, նախագահի հրամանագրով` արգելւում են բոլոր տեսակի հաւաքները, բացառութեամբ Արցախի ժողովրդի ինքնորոշման իրաւունքի իրացման նպատակով, ինչպէս նաեւ Արցախի Հանրապետութեան տօների եւ յիշատակի օրերին կազմակերպուող հաւաքների, որոնք կարող են կազմակերպուել միայն Արցախի Հանրապետութեան կառավարութեան թոյլտուութեան դէպքում:
Արցախի նախագահի մէկ այլ հրամանագրով՝ սահմանափակւում է կարծիքի արտայայտման ազատութիւնը, արգելւում են տեղեկատուութեան որեւէ միջոցով Արցախի Հանրապետութեան պաշտպանունակութեան, անվտանգութեան, տարածքային ամբողջականութեան, ինքնիշխանութեան, սահմանադրական կամ հասարակական կարգի, տնտեսութեան բնականոն զարգացման վերաբերեալ տեղեկութիւններ փնտրելը, ստանալը եւ տարածելը, այդ թւում՝ դրանց դէմ ուղղուած քարոզչութիւնը:
