Կիրակի՝ 2026 թուականի հոկտեմբերի 25-ին, Արեւմտեան թեմի առաջնորդ Գերշ. Տ. Գեղամ Ս. արք. Խաչերեանը ներկայ է գտնուել եւ եզրափակիչ խօսք արտասանել ՀՄԸՄ-ի վաստակաշատ անդամ, հանգուցեալ Սթիւ Արթինեանի յիշատակին նուիրուած հոգեճաշի ընթացքում, որը տեղի է ունեցել Հոլիվուդի Հայ կենտրոնում։
Միջոցառմանը ներկայ են եղել Ազգային վարչութեան ատենապետ և անդամներ, Ազգային կենտրոնական վարչութեան՝ Արեւմտեան շրջանի անդամ Կայծակ Զէյթլեանը, Հոլիվուդի մարմինների եւ յարակից միութիւնների ներկայացուցիչներ, հարազատներ, ընկերներ ու բարեկամներ։
Այս առիթով Արեւմտեան թեմի բարերարներ Վարանդ եւ Հուրի Մելքոնեան ամուսինները կատարել են իրենց սիրելի ընկերոջ անունը կրող եւ իրենց իսկ բարերարութեամբ բարեկարգուած «Սթիւ Արթինեան» սրահի բացումը՝ յաւերժացնելու ազգային գործչի անունն ու յիշատակը։
Պաշտօնական ելոյթներին յաջորդել է Առաջնորդ Սրբազան Հօր եզրափակիչ խօսքը, որի ընթացքում Գեղամ արքեպիսկոպոսն առանձնացրել է մի քանի կարեւոր հանգամանք։
Նա ընդգծել է, որ Սթիւ Արթինեանը եւ նրա նման նուիրեալ գործիչները ձեւաւորուել են Արեւմտեան թեմի ազգային-հայկական կեանքում եւ, հետեւաբար, լաւագոյնս արտացոլում են այս համայնքի հայկական ու ազգային դիմագիծը, որը սերնդից սերունդ փոխանցւում է նաեւ ազգային գործիչների միջոցով։
Սրբազան Հայրը նշել է, որ յիշատակի նման հանդիսութիւնները համայնքի երախտաւոր գործիչների վաստակը գնահատելու եւ նրանց նոր սերնդին ներկայացնելու լաւագոյն առիթներից են։
Անդրադառնալով բարերար Վարանդ Մելքոնեանի կողմից սրահը «Սթիւ Արթինեան» անուանակոչելուն՝ Գեղամ արքեպիսկոպոսն ընդգծել է, որ այդ քայլը նրա ընկերասիրութեան եւ երախտագիտութեան բարձրագոյն արտայայտութիւնն է։ Իր սիրելի եւ անմոռանալի ընկերոջ յիշատակը վառ պահելու նախանձախնդրութեամբ Վարանդ Մելքոնեանը սրահ է նուիրել նրա յիշատակին։
Առաջնորդ Սրբազան Հայրը նաեւ նշել է, որ սրահի «Սթիւ Արթինեան» անուանակոչումը յաւերժացնում է հանգուցեալի անձն ու գործը՝ միաժամանակ դառնալով ընկերասիրութեան խորհրդանիշ։ Այդ արժէքները պէտք է ծառայեն նոր եւ գալիք սերունդների՝ որպէս հայ քրիստոնեայ առողջ դաստիարակութեանը։
Իր խօսքի աւարտին Գեղամ արքեպիսկոպոսն առաջարկել է Մելքոնեան ամուսիններին սրահում զետեղել Սթիւ Արթինեանի անունն ու դիմանկարը, ինչպէս նաեւ նրա հեղինակած խորհրդանշական մի խօսք, որը լաւագոյնս կը ներկայացնի հանգուցեալի ներքին էութիւնը։
Գեղամ արքեպիսկոպոսի առաջարկն ընդունուել է ծափողջոյններով։
Հանդիսութիւնն աւարտուել է «Պահպանիչ» աղօթքով։
