Նախագահութեամբ Հիւսիսային Ամերիկայի երեք Թեմերու Առաջնորդ՝ Գերաշնորհ Տէր Գեղամ Ս․ Արքեպիսկոպոս Խաչերեանի, Տէր Անուշաւան Ս․ Արքեպիսկոպոս Դանիէլեանի եւ Բաբգէն Ս․ Արքեպիսկոպոս Չարեանի, Թարգմանչաց տօնի առթիւ հոգեւորականաց միջ-թեմական երկօրեայ համագումար մը տեղի ունեցաւ 6-8 Հոկտեմբերին, Լոս Անճելըսի Սրբոց Նահատակաց եկեղեցւոյ մէջ։
Ժողովին գլխաւոր թեման էր «Հոգեւոր վերանորոգում՝ ծառայութեան նոր շունչ», ի հետեւումն Նորին Սուրբ Օծութիւն Տ․ Տ․ Արամ Ա․ Կաթողիկոսի «2026 – Հոգեւոր Վերանորոգման Տարի» հռչակագրին։
Ժողովականները իրենց աշխատանքներուն լոյսին տակ անդրադարձան «Տեսիլքէն դէպի առաքելութիւն» եւ «Եկեղեցին այսօրուան մարտահրաւէրներուն դիմաց» առանցքային զոյգ թեմաներուն, յատկապէս քննարկելով, թէ եկեղեցին ինչպիսի տեսլական եւ ռազմավարութիւն պէտք է որդեգրէ վերածաղկեցնելու համար հոգեւոր կեանքը, նաեւ նոր սերունդի կեանքին մէջ արուեստական իմացականութեան ունեցած ազդեցութեան դիմաց ինչպիսի գործնական քայլեր պէտք է առնէ։ Միաժամանակ անոնք զբաղեցան Թեմերէն ներս հովուական, ծիսական եւ կարգապահական հարցերով։
Հոգեւոր հայրերը երախտագիտութեան խոր գիտակցութեամբ իրենց հաւատարմութիւնը յայտնեցին Արամ Ա Կաթողիկոսին, նաեւ իրենց ամբողջական գործակցութիւնը ցուցաբերեցին ի խնդիր Սուրբ Աթոռի առաքելութեան յաջողութեան եւ յառաջդիմութեան։
Ժողովականները նիստերու կողքին ունեցան աղօթական ու խորհրդածութեան պահեր։ Համաձայն աւանդութեան, յատուկ հոգեհանգիստ տեղի ունեցաւ երեք Թեմերուն մէջ ծառայած ու վախճանած հոգեւորականներու հոգւոցն ի հանգիստ։ Հաւաքի կողքին, ներկաները նաեւ հաճոյքով վայելեցին Ֆերահեան վարժարանի աշակերտութեան հրամցուցած գեղարուեստական կոկիկ յայտագիր մը, ինչպէս նաեւ այցելեցին Հոլիվուտի «Կրիֆիթ» աստղադիտարանը։
Համագումարը փակուեցաւ «Պահպանիչ» աղօթքով, Հայրապետական մաղթերգով ու «Կիլիկիա» երգով։
