iPhone-ների օգտատէրերի համար երիտասարդ ծրագրաւորող Ալբերտ Յարութիւնեանը ստեղծել է նոր ստեղնաշար՝ «iBuben Keyboard»-ը, որի միջոցով հասանելի է նաեւ Արցախի բարբառը։
Արցախի Մշակոյթի նախարարութիւնը տարածել է յայտարարութիւն՝ ողջունելով եւ բարձր գնահատելով iOS համակարգի «iBuben Keyboard» բջջային յաւելուածում Արցախի բարբառի ներառմանն ուղղուած մասնաւոր նախաձեռնութիւնը։
«Արցախցիների բռնի տեղահանութեան եւ բռնագաղթի հետեւանքով ստեղծուած այս ծանրագոյն պայմաններում մեր լեզուական ու մշակութային ժառանգութեան պահպանումը, ուսումնասիրութիւնն ու հանրայնացումը ստանում են ռազմավարական նշանակութիւն։ Արցախի բարբառը՝ հայերէնի ամենախոշոր, հնագոյն ու հարուստ բարբառներից մէկը, հանդիսանում է մեր ժողովրդի ազգային ինքնութեան, պատմական յիշողութեան եւ հայրենիք վերադառնալու արդարացի ու անօտարելի իրաւունքի կենսունակութեան հիմնասիւնը։
Այս նախագիծն ունի ինստիտուցիոնալ (էական) առանցքային նշանակութիւն։ Հետազօտող Արմէն Սարգսեանի ակադեմիական աշխատութեան կիրառումն ապահովել է բառապաշարային բազայի (հիմքի) բարձր որակն ու երաշխաւորել օգտագործուող լեզուական նիւթի վաւերականութիւնը։ Միեւնոյն ժամանակ, ժամանակակից բջջային սարքաւորումների՝ բառերի կանխատեսման (աւտոյուշման) գործառոյթում բարբառի ներդրումը նպաստում է առօրեայ հաղորդակցութեան մէջ դրա ակտիւ (գործուն) կիրառմանը, յատկապէս՝ երիտասարդութեան շրջանում, ինչն էական է տարագրութեան մէջ մեր մշակութային դիմագիծը չկորցնելու համար։
Բարբառի փոխադրումը ժամանակակից թուային տիրոյթ արդիւնաւէտ գործիք է մշակութային-լեզուական ժառանգութիւնը դուրսմղումից ու մոռացութիւնից պաշտպանելու համար՝ վառ պահելով մեր պատմական հողերն ու տուն վերադառնալու հաւատը։ Երախտագիտութիւն ենք յայտնում նախագծի հեղինակ Ալբերտ Յարութիւնեանին եւ նախաձեռնութեան իրականացմանը մասնակցած բոլոր մասնագէտներին ու յորդորում քաղաքացիներին ակտիւօրէն (աշխուժութեամբ) օգտագործել հասանելի թուային գործիքները մայրենի լեզուն պահպանելու համար»,- նշուած է յայտարարութեան մէջ։
