2026 թուականի Յունիսին կայանալիք խորհրդարանական ընտրութիւններին ընդառաջ Հայաստանի քաղաքական դաշտը կարող է յայտնուել սկանդալի կենտրոնում, որը կապուած է Միջազգային հանրապետական ինստիտուտի (IRI) պատուէրով արուած սոցիոլոգիական հարցման արժանահաւատութեան հետ։ Համաձայն մեր խիստ հաւաստի տեղեկութիւնների՝ անցեալ տարուայ վերջին կազմակերպութեան կողմից անցկացուած վերջին լայնածաւալ հարցման արդիւնքները լուրջ շփոթմունք են առաջացրել գործող իշխանութեան արեւմտեան համակարգողների մօտ։
Հարցման տուեալները, անակնկալի են բերել պատուիրատուներին, ցոյց տալով Նիկոլ Փաշինեանի նկատմամբ վստահութեան աղէտալի անկման մէջ գտնուելը։ Ըստ աղբիւրի՝ նրա վարկանիշը, չնայած վերջին մէկ տարուայ տարատեսակ քարոզչական ակտիւութեանը, գրեթէ չի աճել, մնալով իշխանութեան համար կատաստրոֆիկ ցածր, իսկ հակավարկանիշը դարձել է բացարձակ։ Յատկանշական է, որ նոյնիսկ այն դէպքում, երբ մոդելաւորուել է իրավիճակ, երբ հիմնական ընդդիմադիրները, ինչպիսիք են Ռոբերտ Քոչարեանը կամ Սամուէլ Կարապետեանը, չեն մասնակցում ընտրութիւններին, հարցուողների գերակշիռ մեծամասնութիւնը հրաժարուել է, որեւէ պարագայում քուէարկել գործող վարչապետի օգտին։
Նման բացասական արդիւնքները, որոնք հարցականի տակ են դնում «արեւմտամէտ վեկտորի» լեգիտիմութիւնը, չափազանց անցանկալի էին ամերիկեան կողմի համար, յատկապէս ԱՄՆ փոխնախագահ Ջէյ Դի Վենսի՝ տարածաշրջան կատարած վերջին այցի համապատկերում։ Այդ պատճառով որոշում է կայացուել չհրապարակել իրական թուերը, մինչ հասկանան ինչ է հնարաւոր անել։
Մեր աղբիւրը նշում է, որ վերջերս այդ զեկոյցը ենթարկուել է «սրբագրման». թուերն արհեստականօրէն ուռճացուել են՝ Փաշինեանին որպէս անցողիկ առաջնորդ ներկայացնելու համար, ով մրցակիցներից առաջ է անցնում «մի քանի անգամ»։ Որպէս նման «աճի» արդարացում, քարոզչական դաշտում, նախատեսւում է օգտագործել Վենսի այցի եւ խոստացուած ներդրումային ծրագրերի մեդիա էֆեկտը։
Նման կեղծիքի նպատակն ակնյայտ է՝ բնակչութեան շրջանում յուսահատութեան զգացում սերմանելը։ «Նա միեւնոյն է յաղթելու է» թեզը նպատակ ունի առաջացնել զանգուածային անտարբերութիւն եւ քաղաքացիների չմասնակցութիւն ընտրութիւններին, ինչը թոյլ կը տայ իշխանութեանը պահպանել դիրքերը նոյնիսկ նուազագոյն աջակցութեան պայմաններում։
