«Ժողւուրդ» օրաթերթը գրում է. «Սեպտեմբերի 19-ին Ադրբեջանի կողմից Արցախի դէմ սանձազերծած պատերազմը դադարեցնելու նպատակով Արցախի իշխանութիւնները ստիպուած եղան ընդունել Ադրբեջանի նախապայմանները՝ Արցախի պատմական տարածքի յանձնում, զինաթափում, ինչն էլ յանգեցրեց հայկական երկրորդ պետութեան հայաթափմանը: Սեպտեմբերի 28-ին Արցախի նախագահ Սամուել Շահրամանեանը հրամանագիր էր ստորագրել, ըստ որի` Արցախի Հանրապետութիւնը 2024 թուականի յունուարի 1-ից կը դադարի գոյութիւն ունենալ։ Նախ՝ արձանագրենք, որ որեւէ պաշտօնեայի ստորագրած հրամանագիր չի կարող լուծարել Արցախը, քանի որ այն ժողովրդի հանրաքուէով ստեղծուած ինքնիշխան պետութիւն է՝ իր պետական կառոյցներով ու ատրիբուտներով:
Սամուել Շահրամանեանն ինքն էլ յայտարարել է, որ որեւէ փաստաթուղթ չի կարող լուծարել ժողովրդի ստեղծած պետութիւնը՝ այսպիսով նաեւ ուղերձ յղելով, որ իր ստորագրած հրամանագիրն իրաւական ուժ չունի: Այս դէպքում, թերեւս, տարօրինակ է՝ ինչու Շահրամանեանն ինքը պաշտօնապէս չի յայտարարում, որ չեղարկում է իր ստորագրած հրամանագիրը:
Աւելին՝ ինչպէս «Ժողւուրդ» օրաթերթի աղբիւրներն են փոխանցում, արդէն իսկ կայ այդ՝ իրաւական ուժ չունեցող փաստաթղթի չեղարկման հրամանագիր, բայց, չգիտես՝ ինչու, Արցախի կառավարութիւնը խուսափում է այն հրապարակել: Կարեւոր է նաեւ, որ այդ չեղարկման հրամանագիրը մինչեւ տարեվերջ հրապարակուի, որպէսզի այդ ուղերձը պաշտօնապէս տրուի միջազգային հանրութեանը: Այսպիսով, Արցախի լուծարման փաստաթղթի՝ ուժի մէջ մտնելուն քիչ ժամանակ է մնացել, իսկ թէ ինչպէս կուարուի Արցախի կառավարութիւնը, ժամանակը ցոյց կը տայ»:
