Հայաստանը շարժւում է դէպի վճռորոշ խորհրդարանական ընտրութիւններ՝ յունիսի 7-ին, եւ դրանց նշանակութիւնը դժուար է գերագնահատել, գրել է ՀՀ ԱԳ նախկին նախարար Վարդան Օսկանեանը։
Նրա բնորոշմամբ, երկրի ողջ տարածքում զգացւում է յոգնածութիւն, հիասթափութիւն եւ դժգոհութիւն՝ ութ տարուայ ընթացքում կուտակուած ազգային ցնցումների, կորուստների, բոլոր տեսակի ձախողումների եւ ապագայի անորոշութեան հետեւանքով։
«Միեւնոյն ժամանակ, այս ընտրութիւնները տեղի են ունենում նոր քաղաքական միջավայրում, որտեղ արդէն ձեւաւորուել են մի շարք լուրջ եւ վստահելի ընդդիմադիր քաղաքական դաշինքներ, որոնք աչքի են ընկնում իրենց ծրագրերով, փորձով եւ կառավարման կարողութեամբ։ Առանձին թէ միասին՝ այս դաշինքները կարող են ապահովել խորհրդարանական յստակ մեծամասնութիւն։
Համենանդէպս, այս իրականութեան պայմաններում ընդդիմութեան եւ հայ հասարակութեան նպատակը չպէտք է լինի միայն այն, որ թոյլ չտան, որպէսզի Փաշինեանը ստանայ պարզ մեծամասնութիւն, այլ նաեւ այն, որ նրա կուսակցութիւնը չյաղթահարի նոյնիսկ խորհրդարան մուտք գործելու նուազագոյն շեմը։
Վերջիվերջոյ, այս ընտրութիւնները վերաբերում են հայ հասարակութեան իրական տրամադրութիւնները յստակ քաղաքական արդիւնքի վերածելուն։ Պայմանները առկայ են՝ դժգոհ ընտրազանգուած, հիասթափուած, յուսալքուած ու նուաստացած հասարակութիւն, վստահելի ու հեռանկարային խաղաղութեան եւ զարգացման ծրագրեր, ինչպէս նաեւ ընդհանուր գիտակցում, որ ներկայ ընթացքը անընդունելի է։
Եթէ հաւաքական ընդդիմութիւնը եւ ընտրողները գործեն յստակութեամբ եւ նպատակասլացութեամբ, արդիւնքը կարող է լինել ոչ միայն պարզ իշխանափոխութիւն, այլեւ արմատական ու լիարժէք քաղաքական վերակառուցում։
Իրօք, մեծ հնարաւորութիւն կայ ոչ միայն փոխել իշխանութիւնը, այլեւ մէկընդմիշտ փակել եւ յիշողութիւնից ջնջել մի փուլ, որը արդէն համարւում է երկրի ամենածանր եւ նուաստացուցիչ ժամանակը, եւ բացել նորը՝ հիմնուած արժանապատուութեան, պատասխանատուութեան, կարողութեան եւ ազգային վերականգնման վրայ», — գրել է նա:
