Հայոց Եկեղեցու բարենորոգութիւնը չի կարող կատարուել արտաքին ճնշումներով, սպառնալիքներով
Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի նախագահութեամբ օգոստոսի 26-ին Մայր Աթոռ Սուրբ Էջմիածնում տեղի ունեցաւ Գերագոյն հոգեւոր խորհրդի, հայաստանեան եպիսկոպոսների եւ թեմակալ առաջնորդների ժողով։
Օրակարգում ընդգրկուած էին Եկեղեցու վարչական, կանոնական, կարգապահական խնդիրներին եւ Եկեղեցու առաքելութեանն առնչուող հարցեր։ Անդրադարձ կատարուեց նաեւ Եկեղեցի-պետութիւն յարաբերութիւններին եւ առկայ իրավիճակին։ Այս առնչութեամբ ժողովը հանդէս եկաւ յայտարարութեամբ.
ՅԱՅՏԱՐԱՐՈՒԹԻՒՆ
Գերագոյն հոգեւոր խորհրդի
Խոր ցաւ ենք ապրում՝ հետեւելով նորակազմ Ազգային ժողովում վերջին օրերին ՔՊ խմբակցութեան դրսեւորած անընդունելի վարքագծին։
Տարակուսելի է, որ հայրենիքի առջեւ ծառացած բազմապիսի մարտահրաւէրների եւ արտաքին վտանգաշատ պարտադրանքների պայմաններում իշխող ուժը սահմանուած պարտականութիւնները կատարելու փոխարէն, Կառավարութեան ծրագրի քննարկման ընթացքում, ակնյայտօրէն ոտնահարելով երկրի Մայր Օրէնքը, անտեսելով միջազգայնօրէն ամրագրուած իրաւունքները, վերստին թիրախաւորում է մեր Սուրբ Եկեղեցին։ Սոյն քաղաքականութիւնն անխուսափելիօրէն յանգեցնելու է առկայ լարուածութեան խորացմանը եւ նոր պառակտումների առջեւ է կանգնեցնելու մեր ժողովրդին հայրենիքում եւ Սփիւռքում։
Եկեղեցին վարկաբեկելու, եկեղեցականներին անուանարկելու եւ թուացեալ ճգնաժամ առաջ բերելու նկրտումներով իշխանութիւններն ակնյայտ կեղծ մեղսագրումներ են կատարում Հայոց Եկեղեցուն՝ վերջինիս մեղադրելով «օտար ազդեցութեան գործակալ» եւ «պետութիւն պետութեան մէջ» լինելու, ինչպէս նաեւ Արցախի աղօթական յիշատակումով, արցախահայութեան իրաւունքների, հոգեւոր-մշակութային ժառանգութեան պահպանման եւ Բաքւում պատանդառուած հայորդիների ազատ արձակման հարցերի արծարծմամբ՝ «պատերազմի կուսակցութիւն» եւ «անվտանգութեան սպառնալիք» հանդիսանալու մէջ։
Ամէն ջանք ի գործ է դրւում Մայր Աթոռի, Ամենայն Հայոց Կաթողիկոսի եւ հոգեւոր դասի դէմ շինծու մեղադրանքներով, անհիմն եւ ուղղորդուող քրէական հետապնդումներով արհեստական հիմքեր ստեղծել ներեկեղեցական կեանքին ու կարգուկանոնին միջամտելու եւ Հայոց Եկեղեցու ինքնավարութիւնը սահմանափակելու՝ այդպիսով ոտնահարելով հաւատացեալների կրօնի եւ խղճի ազատութեան իրաւունքը։
Դատապարտելի նկատելով կատարուողը՝ Գերագոյն հոգեւոր խորհուրդն արձանագրում է, որ Հայոց Եկեղեցու շուրջ փորձ է արւում ձեւաւորել արհեստական օրակարգ։
Կառավարութիւնը որեւէ լիազօրութիւն եւ Սահմանադրութեամբ ամրագրուած իրաւասութիւն չունի Եկեղեցու բարենորոգութիւնը Կառավարութեան ծրագրի մաս դարձնելու, իր հայեցողութեամբ եկեղեցականներին «առաջարկներ» եւ պահանջներ պարտադրելու։ Ազգային ժողովն իրաւասու եւ պատկան հարթակը չէ ներեկեղեցական հարցերի քննարկման։ Հայոց Եկեղեցու բարենորոգութիւնը չի կարող կատարուել արտաքին ճնշումներով, սպառնալիքներով եւ նման կամայականութիւններով։ Իշխանութիւնների հակաեկեղեցական իրական մտադրութիւնների ցուցիչն են նաեւ «Հայոց Եկեղեցու պատմութիւն» առարկայի դուրս բերումը հանրակրթական դպրոցից, ՀՀ Զինուած ուժերում հոգեւոր առաջնորդութեան լուծարումը, քրէակատարողական հիմնարկներում եկեղեցականների հոգեւոր ծառայութեան կասեցումը, չհիմնաւորուած տոյժերի եւ տուգանքների կիրառմամբ Եկեղեցուն յաւելեալ հարկերի պարտադրումը։
Հայոց Եկեղեցին, հաւատարիմ մնալով իր տէրունաւանդ առաքելութեանը, մշտապէս առաջնորդուել եւ առաջնորդւում է հայոց պետութեան եւ աշխարհասփիւռ հայ ժողովրդի շահերով։ Հայոց Եկեղեցին շարունակելու է լինել պաշտպանը մեր ինքնութեան, ջատագովը ազգային միաբանութեան՝ ամենայն ջանք գործադրելով յանուն մեր ժողովրդի խաղաղ, ապահով ու առաջընթաց կեանքի։
