ԵՐԵՎԱՆ, 04 ՀՈՒԼԻՍԻ, ԱՐՄԵՆՊՐԵՍ: Հայաստանի Հանրապետութեան վարչապետ Նիկոլ Փաշինեանը շնորհաւորական ուղերձ է յղել Ամերիկայի Միացեալ Նահանգների նախագահ Ջոյ Բայդենին՝ Անկախութեան օրուայ առթիւ: «Արմենպրես»-ի փոխանցմամբ՝ շնորհաւորական ուղերձում, մասնաւորապէս, ասուած է.
«Մեծարգոյ՛ պարոն նախագահ,
Հայաստանի Հանրապետութեան եւ իմ անունից ջերմօրէն շնորհաւորում եմ Ձեզ եւ Միացեալ Նահանգների բարեկամ ժողովրդին Անկախութեան օրուայ կապակցութեամբ:
Միացեալ Նահանգները եւ իր ժողովուրդը պետութեան կերտման բարդ գործընթացն անցել են անկախութեան գաղափարի շուրջ համախմբման, ժողովրդավարական ապագայի տեսլականի ձեւաւորման եւ դժուարութիւնները միասնաբար յաղթահարելու ճանապարհով։ ԱՄՆ-ի շարունակական առաջնորդութիւնը ժողովրդաւարութեան հարցում իր նպաստն է բերում ազատութեան, հաւասարութեան եւ մարդու անօտարելի իրաւունքների հիմնարար արժէքների առաջմղմանը բազմաթիւ երկրներում։
Վերջին տարիների հայ-ամերիկեան ակտիւ երկկողմ յարաբերութիւնները խոստումնալից են՝ յատկապէս ժողովրդավարական բարեփոխումների, օրէնքի գերակայութեան ամրապնդման եւ կոռուպցիայի դէմ պայքարի ոլորտներում։ Ուրախ եմ արձանագրել, որ մեր կառավարութիւնների միջեւ առկայ է փոխվստահութեան վրայ հիմնուած համագործակցութիւն, ինչը հնարաւորութիւն է տալիս արդիւնաւետ կերպով հասցէագրելու առկայ մարտահրաւէրները եւ առաւել ամրապնդելու մեր պետութիւն ների ու ժողովուրդների միջեւ կապը։
Մենք բարձր ենք գնահատում Հայաստանի Հանրապետութեան տարածքային ամբողջականութեան, ինքնիշխանութեան եւ ժողովրդաւարութեան աջակցութեան հարցում Միացեալ Նահանգների դիրքորոշումը, որը գործնականում դրսեւորուեց 2021-2022 թուականների ընթացքում: Մենք բարձր ենք գնահատում նաեւ ԱՄՆ-ի ջանքերը Հարաւային Կովկասում երկարատեւ եւ կայուն խաղաղութիւն հաստատելու, Հայաստան-Ադրբեջան յարաբերութիւնների կարգաւորման ու Լեռնային Ղարաբաղի ժողովրդի իրաւունքների եւ անվտանգութեան հասցէագրման ուղղութեամբ։ Հայաստանի Հանրապետութիւնը շարունակում է հաւատարիմ մնալ խաղաղութեան օրակարգին՝ հանուն Հայաստանի Հանրապետութեան տարածքային ամբողջականութեան անձեռնմխելիութեան, հանուն անկախութեան, ինքնիշխանութեան եւ տարածաշրջանում երկարատեւ խաղաղ զարգացման։
Պարոն նախագահ, կրկին շնորհաւորում եմ Ձեզ Անկախութեան օրուայ կապակցութեամբ եւ մաղթում եմ Ձեզ եւ Ամերիկայի ժողովրդին բարօրութիւն, խաղաղութիւն եւ շարունակական առաջընթաց»:
