Ռուս խաղաղապահները Լեռնային Ղարաբաղի բնակիչները շրջան վերադարձնելու կարելիութեան երաշխաւորն են. երէկ Մոսկուայի մէջ մամլոյ ասուլիսի ընթացքին յայտարարած է Ռուսիոյ զինեալ ուժերու սպայակոյտի պետ Վալերի Կերասիմովը: Մամլոյ ասուլիսը նուիրուած էր Ռուսիոյ պաշտպանութեան նախարարութեան 2023 թուականի գործունէութեան արդիւնքներուն:
«Այս տարուան սեպտեմբերին ռուս խաղաղապահներու միջնորդական ջանքերուն շնորհիւ 24 ժամուան ընթացքին (Արցախի մէջ, «Ա.») զինադադար ձեռք բերուեցաւ: Զինուորական գործողութիւններու ընթացքին ռուսական խաղաղապահ զօրախումբը ապահոված է աւելի քան 10 հազար խաղաղ բնակիչի տեղափոխումը իր տեղակայման վայրեր, իսկ յետոյ` Ղարաբաղի գրեթէ ամբողջ բնակչութեան անվտանգ ելքը Հայաստանի տարածք: Խաղաղապահները շուրջ 300 վիրաւոր օդային փոխադրամիջոցով տեղափոխած են հիւանդանոցներ:
«Միեւնոյն ժամանակ, մեր զօրախումբը կը շարունակէ առաջադրանքներ կատարել` իբրեւ խաղաղ կեանք կառուցելու եւ բնակիչները շրջան վերադարձնելու կարելիութեան երաշխաւոր», ըսած է Կերասիմով:
Ան նշած է, որ Անդրկովկասի մէջ կացութիւնը կը շարունակէ լարուած մնալ, սակայն կայունացման յստակ միտում ունի:
«Ռուսիան քաղաքական ոլորտին մէջ նպատակաուղղուած աշխատանք կը տանի Անդրկովկասի մէջ փոխադրամիջոցային հաղորդակցութիւններու ապաշրջափակման, Պաքուի եւ Երեւանի միջեւ խաղաղութեան համաձայնագիրի կնքման, ինչպէս նաեւ հայ-ազրպէյճանական ամէնէն սուր հակասութիւններուն լուծման ուղղութեամբ», ըսած է զօր. Կերասիմով:
