Արցախցիները նամակով դիմել են Վեհափառին՝ խնդրելով քննարկել Արցախի թեմի առաջնորդին փոխելու հարցը:
Արցախեան քաղհասարակութեան ներկայացուցիչների նամակը՝ ուղղուած Ն․Ս․Օ․Տ․Տ․ Գարեգին Բ Ամենայն հայոց կաթողիկոսին
«Վեհափառ Տեր, Արցախցիներս ակամայից կանգնած ենք ցաւալի իրողութեան առաջ՝ դիմել Ձերդ Սրբութեանը՝ յայտնելով մեր խորը հիասթափութիւնն ու զայրոյթը ՀԱՍԵ Արցախի թեմի ներկայիս առաջնորդ Վրթանես եպիսկոպոս Աբրահամեանի վերջին քայլերի եւ հրապարակային պահուածքի վերաբերեալ։
Խիստ մտահոգիչ եւ անասելի վիրաւորական էր բոլորիս համար տեսնել, թէ ինչպէս է Վրթանես եպիսկոպոս Աբրահամեանը, խախտելով մեր Սուրբ Եկեղեցու օրէնքները, փաստացի ըմբոստացել ազգընտիր եւ օծեալ Ամենայն Հայոց Հայրապետի դէմ, ով մշտապէս իր անքակտելի ուշադրութեան կենտրոնում է պահել ու պահում Արցախ աշխարհի եւ արցախահայութեան խնդիրները՝ հանդէս գալով մեր իրաւունքների պաշտպանութեան կարեւորագոյն նախաձեռնութիւններով, այդ թւում՝ միջազգային բարձր հարթակներում։
Մեզ համար անընդունելի է նաեւ այն, որ Վրթանես եպիսկոպոս Աբրահամեանը, ով կոչուած է պաշտպանելու իրեն յանձնուած սրբութիւններն ու հաւատաւոր ժողովրդին, այդ կոչմանը հակընդդէմ գործողութիւններ է կատարում։ Նա, մասնաւորապէս, յարգանքի ու պատուի է արժանացնում Արցախն իր վանքերով, եկեղեցիներով, խաչքարերով, գերեզմաններով ու սրբավայրերով թշնամուն յանձնելու քաղաքական որոշման թիւ մէկ պատասխանատուին՝ փաստացիօրէն միանալով վերջինիս հակաեկեղեցական սրբապիղծ արշաւին։
Նման քայլը թէ՛ իր բովանդակութեամբ, թէ՛ իրականացման ձեւով մեր բոլորի կողմից ընկալուեց ոչ միայն խոնարհում Նիկոլ Փաշինեանի առջեւ, այլ նաեւ վերջինիս քայլերի ուղղակի արդարացում, ինչն, իհարկէ, առաջացրեց Արցախի մեր ժողովրդի արդարացի զայրոյթն ու վստահութեան կորուստը տուեալ հոգեւոր առաջնորդի նկատմամբ։
Առանձնապէս ցաւալի է, որ մեր հաւատաւոր ժողովրդի բազում դիմումներին ի պատասխան՝ նա մինչ օրս ոչ միայն չի զղջացել եւ ներողութիւն չի յայտնել արցախահայութեանը, այլ նոյնիսկ խուսափում է սեփական հայրենակիցների ու հաւատաւոր հօտի հետ հանդիպումներից, չի պատասխանում հեռախօսազանգերին, ցուցաբերում է բացայայտ անյարգալից վերաբերմունք իրեն յանձնուած համայնքի նկատմամբ։
Վերոգրեալի հիման վրայ խնդրում ենք քննարկել Արցախի թեմի առաջնորդին փոխելու հարցը, քանզի ներկայիս առաջնորդը լիովին կորցրել է Արցախի հաւատացեալ ժողովրդի վստահութիւնը, եւ իր իսկ բռնած ճանապարհի պատճառով այլեւս չունի որեւէ բարոյական հիմք՝ շարունակելու առաջնորդել դաւաճանուած Արցախի հայոց թեմը։
Խնդրում ենք Ձերդ Սրբութեանն ընդառաջ գալ Արցախի Ձեր հոգեւոր զաւակների խնդրանքին եւ մեր ձայնը լսել որպէս հաւատաւոր ժողովրդի իրական զգացմունքների արտայայտութիւն։
Որդիական խոնարհութեամբ մատչիմք ի համբոյր Ձերդ Սրբութեան Օծեալ Սուրբ Աջոյն`
Ռոման Երիցեան իրաւապաշտպան, փաստաբան
Յայտարարութեանը միացած հասարակական կազմակերպութիւններ
«Արցախի աւագների խորհուրդ» ՀԿ
«Վասն հայրենեաց» ՀԿ
«Արցախ Միութիւն» ՀԿ
«Արցախի օեամայ կիոկուշին կարատէ-դոյ ֆեդերացիայ» ՀԿ
«Արցախի մշակոյթի եւ զբօսաշրջութեան զարգացման գործակալութիւն» ՀԿ
«Վերածնուող Արցախ» ՀԿ
«Արդարութիւն եւ վերադարձ» ՀԿ
«Աւէտիս Պուլուզեան» բարեգործական ՀԿ
«Մտքի ուժ» ՀԿ
«Նախնեաց հետքերով» ՀԿ
«Հաւասար հնարաւորութիւն» սոցիալական, երիտասարդական ՀԿ
Արցախի «Զինուորի կողքին» ՀԿ
«Արցախեան մշակոյթի պահպանման կենտրոն» ՀԿ
«Մայրութիւն» ՀԿ
«Վերադարձ» կիոկուշին կարատէի ակումբ ՀԿ
«Այսօր հանուն վաղուայ» ՀԿ
«Արցախի սպորտի եւ երիտասարդութեան զարգացման կենտրոն» ՀԿ
«Արցախի մարտարուեստների ասոցիացիայ» ՀԿ
«Արցախի խառը մենամարտէրի ֆեդերացիայ» ՀԿ
«Արցախի մուայթայի ֆեդերացիայ» ՀԿ
Յայտարարութեանը միացած հասարակական գործիչներ
Ռուբէն Մելիքեան-Արցախի 2-րդ Մարդու իրաւունքների պաշտպան
Արտակ Բեգլարեան-Արցախի 3-րդ Մարդու իրաւունքների պաշտպան
Գեղամ Ստեփանեան-Արցախի գործող Մարդու իրաւունքների պաշտպան
Նարէ Սիմոնեան -հասարակական գործիչ»
Արցախի պահպանութեան կոմիտէն պահանջում է կաթողիկոսից անյապաղ փոխել Արցախի թեմի առաջնորդին
Արցախի պահպանութեան կոմիտէն յայտարարութիւն է տարածել, որտեղ նշուած է.
«Արցախի պահպանութեան կոմիտէն արձանագրում է՝ Արցախի թեմի առաջնորդ Վրթանես եպիսկոպոս Աբրահամեանի վերջին վարքագիծը եւ հանրային դաշտում հաստատուած քայլերը յանգեցրել են վստահութեան փաստացի փլուզման՝ թէ՛ արցախահայութեան, թէ՛ թեմական կեանքի ներսում։
Մենք խիստ դատապարտում ենք այն հանգամանքը, որ Արցախի թեմի առաջնորդի անունն ու դիրքը յայտնուել են քաղաքական շփումների եւ գործընթացների կենտրոնում՝ այն պայմաններում, երբ արցախահայութիւնը դեռ կրում է տեղահանութեան, կորստի եւ ազգային աղէտի ծանր հետեւանքները։ Արցախի թեմի առաջնորդի պարտականութիւնն է լինել ժողովրդի կողքին՝ ոչ թէ ստեղծել այնպիսի տպաւորութիւն, որ թեմի բարձր ամբիոնը վերածւում է քաղաքական օրակարգերի գործիքի։
Վրթանես եպիսկոպոս Աբրահամեանի կողմից ցուցաբերուած մօտեցումը, անկախ յետագայ մեկնաբանութիւններից, արդէն իսկ առաջացրել է հանրային արդարացի վրդովմունք, թեմի ներսում՝ լեգիտիմութեան կասկած, իսկ արցախահայութեան շրջանում՝ հոգեւոր առաջնորդի դերակատարման մերժում։ Այս իրավիճակը նշանակում է մէկ բան՝ տուեալ առաջնորդութիւնը այլեւս չի ապահւում թեմի միասնականութիւնը, հեղինակութիւնն ու հոգեւոր անվտանգութիւնը։
Ուստի Արցախի պահպանութեան կոմիտէն.
Պահանջում է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսից՝ անյապաղ փոխել Արցախի թեմի առաջնորդին, քանի որ ստեղծուած պայմաններում թեմը չի կարող ղեկավարուել վստահութեան բացակայութեամբ եւ շարունակական ներքին լարուածութեամբ։
Կոչ է անում Մայր Աթոռ Սուրբ Էջմիածնին՝ առանց ձգձգման նշանակել ժամանակաւոր տեղապահ եւ ապահովել կանոնական կարգով թեմի բնականոնացման ընթացքը։
Պահանջում է, որ Վրթանես եպիսկոպոս Աբրահամեանը հրապարակային, յստակ եւ փաստարկուած պատասխան տա՝ ինչ սկզբունքներով եւ ինչ պատասխանատուութեամբ է առաջնորդուել՝ գիտակցելով, որ Արցախի թեմի առաջնորդի իւրաքանչիւր քայլ ունի ազգային եւ հոգեւոր ծանր հետեւանքներ։
Մենք յայտարարում ենք յստակ՝ Արցախի թեմը չի կարող լինել փորձարկումների, անձնական նախաձեռնութիւնների կամ քաղաքական մանեւրների հարթակ։ Երբ առաջնորդը դառնում է բաժանման պատճառ, նա այլեւս չի կատարում առաջնորդի առաքելութիւնը»։
