Արցախի Ազգային ժողովը չի ընդունում Արցախն Ադրբեջանի կազմում ճանաչելու Հայաստանի վարչապետի յայտարարութիւնը, ասուած է խորհրդարանի արտահերթ նիստում ներկայացուած յայտարարութեան մէջ։ Այն այս պահին քննարկման է դրուած, ներկայացրեց ԱԺ արտաքին յարաբերութիւնների յանձնաժողովի նախագահ Վահրամ Բալայանը։
«ՀՀ վարչապետ Նիկոլ Փաշինեանի այսօրուայ յայտարարութիւնը, որի մէջ նա վերահաստատել է իր պատրաստակամութիւնը՝ Արցախը ներառելու Ադրբեջանի կազմում, խիստ վրդովմունք ու զայրոյթ է առաջ բերել Արցախի Հանրապետութիւնում», — ասուած է տեքստում։
Ըստ Արցախի օրէնսդիր մարմնում քննարկուող յայտարարութեան՝ այդ յանձնառութեամբ Հայաստանի ղեկավարը կոպտօրէն խախտում է ՀՀ անկախութեան հռչակագրի ու Սահմանադրութեան ամրագրումներն Արցախի մասին։
«Եւս մէկ անգամ վերահաստատում ենք, որ Արցախի կարգավիճակն արդէն իսկ որոշուել է 1991թ. դեկտեմբերի 10-ի համաժողովրդական կամարտայայտութեամբ, եւ որեւէ իշխանութիւն իրաւասու չէ այն բեկանելու։ Մեզ համար անընդունելի եւ առոչինչ են Արցախի Հանրապետութեան ինքնիշխանութիւնը, մեր ժողովրդի ինքնորոշման իրաւունքը եւ դրա իրացման փաստն անտեսող Նիկոլ Փաշինեանի ցանկացած յայտարարութիւն եւ դրա հիման վրայ կազմած որեւէ փաստաթուղթ։ Արցախը երբեք չի հրաժարուելու իր պայքարի անշեղ ուղուց», — ներկայացրեց Վահրամ Բալայանը։
Հայաստանը պատրաստ է ճանաչել Լեռնային Ղարաբաղը Ադրբեջանի մաս, այսօր ասուլիսի ժամանակ յայտարարել է վարչապետ Նիկոլ Փաշինեանը՝ աւելի յստակեցնելով, թէ ինչ նկատի ունի Երեւանը, երբ խօսում է Ադրբեջանի 86 հազար 600 քառակուսի մետր տարածքային ամբողջականութեան մասին։ Միաժամանակ, սակայն, ըստ Փաշինեանի, Լեռնային Ղարաբաղի հայութեան իրաւունքների եւ անվտանգութեան հարցը պէտք է քննարկուի Ստեփանակերտ — Բաքու երկխօսութեան միջոցով։
«Ի՞նչ իրաւունքների, անվտանգութեան եւ երկխօսութեան մասին խօսք կարող է լինել, երբ Ադրբեջանն ապօրինաբար 162 օր Արցախը պահում է լիակատար շրջափակման մէջ», — Լեռնային Ղարաբաղի խորհրդարանի նիստին քիչ առաջ ելոյթով հարցրեց խօսնակ Արթուր Թովմասեանը։
