Եկեղեցին անկոտրում է, մենք չենք ընկրկելու, չենք նահանջելու։ Այս մասին այսօր (փետր. 15-ին, ԽՄԲ.) լրագրողների հետ զրոյցում ասաց Մայր Աթոռի Արտաքին յարաբերութիւնների եւ արարողակարգի բաժնի տնօրէն Նաթան արքեպիսկոպոս Յովհաննիսեանը։
«Սա մի ծրագիր է եկեղեցու դէմ եւ ամէն կերպ փորձում են ապացուցել, որ եկեղեցին պէտք է դառնայ պետութեան մի կցորդ, որը պէտք է շարունակի այն ցանկութիւնը, որ իշխող ուժն ունի։ Սակայն, Եկեղեցին անկոտրում է, մենք չենք ընկրկելու, չենք նահանջելու եւ պահելու ենք այն, ինչ ստեղծել է հայ եկեղեցին եւ պահել է հայ եկեղեցին։ Իշխանութիւնները մէկ օրակարգ ունեն՝ փոխելու Ամենայն Հայոց Կաթողիկոսին, որն իրենց լիազօրութիւնից դուրս է»,- ասել է Նաթան Սրբազանը։
Յիշեցնենք, որ Աւստրիայում կայանալիք Եպիսկոպոսաց ժողովից օրեր առաջ դատախազութիւնը քրէական գործ է յարուցել Ամենայն Հայոց Կաթողիկոսի նկատմամբ, Վեհափառի նկատմամբ խափանման միջոց է կիրառւել բացակայելու արգելքը։ Եւս 6 եպիսկոպոսի արգելւել է բացակայել երկրից։
