Համացանցի էջին խմբագրութիւնը ներկայացրել է «Դրօշակի» 2024 թուականի մարտեան համարը: Համարի «Առաջնորդողի» խորագիրն է «Ոտատակ ընկած Նիկոլ, ոտատակ եղող Հայաստան», ինչը ճշգրտօրէն արտայայտում է այսօրուայ Հայաստանի ղեկավարի քաղաքական վարքը, ինչի հետեւանքն էլ աշխարհաքաղաքական վտանգաւոր գործընթացների յորձանուտի մէջ ընկղմուող մեր երկիրն է:
Ի դէպ, ՀՅ Դաշնակցութեան Բիւրոն օրեր առաջ յայտարարութեամբ անդրադարձաւ իշխանութիւնների կործանարար քաղաքականութեանը, մասնաւորապէս, Արցախից յետոյ այժմ էլ Հայաստանից տարածքներ զիջելու անհեռատես եւ անպատասխանատու գործունէութեանը: Նշուած յայտարարութիւնը նոյնպէս ներկայացուած է «Դրօշակի» այս համարում:
Եթէ իշխանութիւնները ամէն ճիգ ու ջանք գործադրում են փակելու, մոռացութեան մատնելու Արցախ էջը, ապա ազգային եւ բանական հայ մարդկանց համար անընդունելի պէտք է լինի ազգային շահերի ոտնայարման այս բացայայտ դաւաճանական քայլը: «Դրօշակը» սոյն համարում մի քանի յօդուածով անդրադարձել է Արցախի հարցին իրաւաքաղաքական տեսանկիւնից, քննելով թէ՛ այսօր Հայաստանի Հանրապետութիւնում ապաստանած արցախահայութեան առջեւ ծառացած իրաւական բնոյթի խնդիրները, թէ՛ անդրադառնալով Արցախի հանրապետութեան նկատմամբ Հայաստանի ստանձնած պարտաւորութիւններին: Այս շարքում ուշագրաւ է նաեւ պատմաբան Արմէն Մարուքեանի յօդուածը, որն անդրադարձ է միջազգային ասպարէզում Արցախի հարցի հետապնդման իրաւական հիմքերին:
Մոտենում է ապրիլի 24-ը, որն իհարկէ կարեւոր առիթ է, թէեւ առանց յատուկ առիթի էլ Ցեղասպանութեան եւ նրանից բխող Հայ դատի խնդիրները երբեք չպէտք է դուրս դրուեն հայկական օրակարգերից:
«Դրօշակի» այս համարում, մի քանի հեղինակներ, տարբեր դիտանկիւններից անդրադարձել են այս չսպառուող ցաւոտ թեմային:
«Դրօշակի» «Ընկերական զրոյցների» շարքը մշտապէս ներկայացնող գրող-հրապարակագիր Վրեժ-Արմենը այս անգամ անդրադառնում է մի երեւոյթի, որը կարելի է կոչել «հասարակական մեր կեանքը կարգաւորող կանոններ» մասնաւորեցնելով ասելիքը «մեր ինքնութեան պահպանման» կանոնների եւ թելադրանքների վրայ:
Ինչպէս միշտ ընթերցողը ակնարկուած նիւթերի կողքին կգտնի այլ հետքրքրական յօդուածներ եւս: «Դրօշակ»ի 2024թ երրորդ համարը համացանցում կարող եք գտնել droshak.am հասցէի ներքոյ:
«Դրօշակ» թիւ 3, 2024թ.
