Արցախի պաշտպանութեան բանակի մամուլի նախկին խօսնակ Սենոր Հասրաթեանը գրում է․
«Սիրելի հայրենակիցնե՜ր, վերջապէս ուշքի եկեք, բացեք ձեր աչքերն ու ականջները եւ ուղիղ նայեք իրականութեանը… Նայեք ու յիշեք ձեզ այնպիսին, ինչպիսին աւելի քան չորս տարի առաջ էիք՝ յաղթող, պարտադրող եւ հպարտ… Այդպիսինն էիք, քանի որ ոչ թէ թշնամին էր թոյլ, այլ ՄԵՆՔ էինք ուժեղ մեր ժողովրդով ու բանակով եւ, որ ամենակարեւորն է՝ իւրաքանչիւր ոք գիտէր իր տեղն ու անելիքը… Դժբախտաբար, այսօր ամէն ինչ իրար ենք խառնել եւ արդիւնքում հասել այն տագնապալի կէտին, երբ ԱԶԳԻ մի հատուածը թշնամական խուլ շրջափակման մէջ փրկութեան ելք է որոնում, իսկ միւս հատուածը, մնալով այդ ցաւին անհաղորդ, անթաքոյց հրճուանքով իր առօրեան է ըմբոշխնում… Հասկացե՜ք, սա, իրօք, անընդունելի եւ անտանելի է… Անտանելի է ապրել մի իրականութեան մէջ, երբ արտաքին թշնամին՝ ներքին տականքի լուռ համաձայնութեամբ՝ աւերում է այն ամէնը, որը տարիներով ստեղծուել է Հայրենիքի զգացողութիւն ունեցող նուիրեալների յամառութեան ու արեան գնով…
Հասկացէ՜ք, այս վիճակի մեղաւորը մէկն է, եւ այդ մէկը ոչ թէ դրսում է, այլ մեր ներսում…»։
