ՀՅԴ Հայաստանի Գերագոյն մարմնի յայտարարութիւնը
Հայաստանն Արցախին կապող երթուղու փոփոխութեամբ պայմանաւորուած, վերջին օրերին, ադրբեջանական զինուած ուժերը Տեղ գիւղի ուղղութեամբ անարգել մուտք են գործել ՀՀ ինքնիշխան տարածք եւ գրաւել կարեւոր ռազմավարական գերիշխող դիրքեր։ Այս ամէնը՝ ՀՀ ներկայ իշխանութեան անգործութեան կամ էլ լուռ ու գաղտնի համաձայնութեան հետեւանք է։
ՀՀ վարչապետի պաշտօնը զբաղեցնող անձը նախ յայտարարեց, թէ վերադիրքաւորումները կապուած են ադրբեջանական կողմի հետ նախկինում ձեռք բերուած պայմանաւորուածութիւնների համաձայն Լաչինի միջանցքին կապող երթուղին ապրիլի 1-ից Կոռնիձորով անցնելու հետ եւ հայկական դիրքերի որեւէ փոփոխութիւն տեղի չի ունեցել։
Սակայն հանրային ահազանգից յետոյ, ՀՀ ԱԱԾ-ն ստիպուած «պարզաբանում» տարածեց, ըստ էութեան, ընդունելով, որ որեւէ տեղ չարձանագրուած նախկինում եղած պայմանաւորուածութիւնները խախտելով ադրբեջանական կողմը 5 ուղղութիւններով սահմանից 100-ից 300 մետր աւելի առաջ է տեղակայուել։
Առկայ փաստերը, ՀՀ ԱԺ «Հայաստան» խմբակցութեան պատգամաւորների Սիւնիք կատարած այցի եւ տեղում առանձին հանդիպումների արդիւնքում ստացուած տուեալները ստիպում են արձանագրել, որ.
1.2020 թուականի նոյեմբերի 9-ից յետոյ, Ադրբեջանը իրարայաջորդ յարձակումներով ու առաջխաղացումներով, գրաւած պահելով ՀՀ ինքնիշխան տարածքների հսկայական հատուածներ, ակտիւ կերպով շարունակում է ամրակայման աշխատանքների իրականացումը, ինչի հետեւանքով տեղի է ունենում փաստացի սողացող անեքսիայ։
2.Նման ագրեսիւութեանն ի պատասխան, ՀՀ իշխանութիւնները յղում անելով ինչ որ բանաւոր պայմանաւորուածութիւների, ինքնակամ զիջում են ՀՀ ինքնիշխան տարածքներ՝ ստեղծելով լրջագոյն անվտանգային սպառանալիքներ։
3.Մինչեւ հիմա պարզաբանուած չէ, թէ ի՞նչ պայմանաւորուածութիւններ են նախկինում ձեռք բերուել, ի՞նչ փաստաթղթով են դրանք ամրագրուել, ինչի՞ հիման վրայ է ՀՀ սահմանի առանձին հատուածները համարւում Ադրբեջանի հետ արդէն ճշգրտուած։
4.Թշնամին, փաստօրէն կամայականօրէն կատարում է սահմանազատում ու սահմանագծում՝ ըստ իր ցանկութեան, ինչը վտանգաւոր նախադրեալներ է ստեղծում գալիք որեւէ բանակցութիւնների համար։
Անընդունելի եւ դատապարտելի է այն փաստը, որ թշնամու սանձարձակ ու անարգել գործողութիւններին հակազդելու փոխարէն, ՀՀ իշխանութիւնը շարունակում է անգործութիւն դրսեւորել եւ հանրութեանը կերակրել անատամ եւ մոլերցնող յայտարարութիւններով։
ՀՅԴ Հայաստանի Գերագոյն Մարմինը մէկ անգամ եւս հաստատում է, որ ՀՀ իշխանութիւնը, վաղուց հրաժարուել է մեր երկրի անվտանգութեան նկատմամբ իր առաջնային պարտաւորութիւնից եւ խաղաղութեան կեղծ օրակարգով երկիրը տանում է նոր պատերազմի եւ զիջումների։
Այս պայմաններում, անհրաժեշտ ենք համարում ՀՀ պետական եւ ազգային շահերով առաջնորդուող բոլոր առողջ ուժերի եւ հանրութեան համախմբման անհրաժեշտութիւնը, թոյլ չտալու համար, որ թշնամու կամակատար այս իշխանութիւնը շարունակի իր ազգակործան ընթացքը։
ՀՅԴ ՀԱՅԱՍՏԱՆԻ ԳԵՐԱԳՈՒՅՆ ՄԱՐՄԻՆ
03․04․2023 թ
