«Ժողւուրդ» օրաթերթը գրում է. Քաղաքական իշխանութիւնները հանրութեանը շեղում են բուն օրակարգից: Բանն այն է, որ երէկ ՀՀ գլխաւոր դատախազ Աննայ Վարդապետեանը եւս մէկ միջնորդութիւն է ներկայացրել Ազգային ժողովի նախագահին: Այս անգամ դատախազը միջնորդել է ՀՀ ԱԺ «Հայաստան» խմբակցութեան պատգամաւոր Արմէն Չարչեանի նկատմամբ քրէական հետապնդում յարուցելու մասին հարցին համաձայնութիւն տալու վերաբերեալ: Յունուարի 20-ին նման միջնորդութիւն երեք դրուագով ներկայացուել էր նաեւ ՀՀ պաշտպանութեան նախկին նախարար, «Հայաստան» խմբակցութեան ղեկավար Սեյրան Օհանեանի մասով:
Աւելին՝ «Ժողւուրդ» օրաթերթը տեղեկացաւ, որ միջնորդութիւններ կը լինէն նաեւ նոյն խմբակցութեան պատգամաւորներ Իշխան Սաղաթելեանի եւ Գեղամ Մանուկեանի մասով: Իսկ ո՞րն է իշխանութիւնների նպատակը: Ակնյայտ է, որ քաղաքական իշխանութիւնը նպատակ ունի շեղել հանրութեան ուշադրութիւնը երկրում կատարուող իրադարձութիւնների հանդէպ: Ինչպէս յայտնի է, դեկտեմբերի 12-ից փակ է Լաչինի միջանցքը, իսկ յունուարի 19-ին Գեղարքունիքի մարզի Ազատ համայնքում տեղի ունեցած ողբերգական միջադէպով դեռ շատ հարցեր մնում են անպատասխան, եւ այսպէս, կարծես թէ, իշխանութիւնը շեղում է ուշադրութիւնը:
Ինչպէս յայտնի է, բոլոր միջնորդութիւնները պէտք է քննարկուեն հերթական նստաշրջանի առաջին նիստի օրը, այս դէպքում՝ փետրուարի 7-ին: Յենց այդ նստաշրջանում մի քանի ժամ միայն այս քննարկումն է տեւելու՝ կարեւոր այլ օրակարգային հարցերը մի կողմ թողած: Նկատենք՝ Արմէն Չարչեանի գործը վերաբերում է յայտնի Հաց բերողին՝ Արթուր Սարգսեանին, եւ, ամենան հաւանականութեամբ, այն վաղեմութեան ժամկէտով կարճուելու է. Գեղամ Մանուկեանին իր յայտարարութիւնների համար կալանաւորել չէն կարող, իսկ, ահա, Իշխան Սաղաթելեանին կալանաւորելն էլ կդիտուի քաղաքական՝ հաշուի առնելով, որ նա ՀՅԴ ԳՄ ներկայացուցիչ է, եւ լայն արձագանք կ’ունենայ քայլը:
Սեյրան Օհանեանին կալանաւորելու ցանկութիւն եւ որոշում եղել է, սակայն քաղաքական իշխանութիւնն այս հարցով էլ որոշել է նրան այս փուլում չկալանաւորել, այլ միայն քրէական հետապնդում յարուցելու մասին միջնորդութիւն ներկայացնել: Ֆիքսենք՝ նախորդ դէպքերում, երբ դատախազութիւնը կոնկրէտ պատգամաւորի մասով միջնորդութիւն է ներկայացրել ԱԺ, եղել է երկու մասից բաղկացած՝ մէկով միջնորդել են անձեռնմխելիութիւնից զրկել պատգամաւորին՝ քրգործում որպէս մեղադրեալ ներգրաւելով, միւսով ազատութիւնից զրկելու միջնորդութիւն է եղել:
Այդպէս է եղել թէ՛ նախկին պատգամաւորներ Մանուել Գրիգորեանի, թէ՛ Գագիկ Ծառուկեանի մասով, իսկ այս դէպքում միջնորդութիւնները վերաբերում են միայն անձեռնմխելիութիւնից զրկելուն, ինչը ենթադրել է տալիս, որ պատգամաւորները չէն կալանաւորուի: Այս ամէնը պարզապէս շոու է՝ հասարակութեանը զբաղեցնելու համար»:
