2023թ․ յունուարի 19-ին Եւրոպական Խորհրդարանն իր լիագումար նիստում ընդունել է «Լեռնային Ղարաբաղում շրջափակման հումանիտար հետեւանքները» վերտառութեամբ բանաձեւ, որով խորհրդարանն արձանագրել է շրջափակման արդիւնքում Արցախում ստեղծուած հումանիտար հետեւանքները։ Եւրոպական Խորհրդարանն Ադրբեջանին յորդորում է յարգել եւ իրականացնել 2020 թուականի նոյեմբերի 9-ի եռակողմ յայտարարութեամբ ստանձնած պարտաւորութիւնները եւ անյապաղ վերաբացել Լաչինի միջանցքը։ Բանաձեւով քննադատուել է ադրբեջանական իշխանութիւնների հայութեան նկատմամբ խտրական հռետորաբանութիւնը, ինչպէս նաեւ կարեւորուել է առանց նախապայմանների եւ ԵԱՀԿ Հելսինկեան Եզրափակիչ ակտի հիման վրայ բանակցութիւնների վերսկսումը։
Եւրոպական Խորհրդարանը նաեւ կարեւորում է Լեռնային Ղարաբաղ միջազգային կազմակերպութիւնների մուտքն ու տեղում հումանիտար առաքելութիւնների իրականացումը, ինչպէս նաեւ կոչ է անում Եւրոպական Միութեան ղեկավարութեանը ակտիւօրէն ներգրաւուած լինել բանակցութիւններում եւ ապահովել, որպէսզի Լեռնային Ղարաբաղի բնակիչներն այլեւս չհանդիսանան Բաքուի գործողութիւնների պատանդը։
Անդրադառնալով Եւրոպական Խորհրդարանի կողմից յիշեալ բանաձեւի ընդունմանը՝ ՀՅԴ Հայ դատի Եւրոպայի գրասենեակի նախագահ Գասպար Կարապետեանը յոյս է յայտնել, որ այս գործընթացը կեանգեցնի Եւրոպական Միութեան գործադիր մարմինների վրայ ճնշման, որպէսզի վերջիններս իրենց հերթին ճնշէն Ադրբեջանին՝ վերջ տալու իր վարած էթնիկ զտման քաղաքականութեանը եւ վերադառնալու խաղաղ բանակցութիւնների՝ ԵԱՀԿ Հելսինկեան եզրափակիչ ակտի հիմնարարար սկզբունքների հիման վրայ։
ՀՅԴ Բիւրոյի Հայ Դատի կենտրոնական գրասենեակ
19.01.2023թ
