Վահէ Յովհաննիսեան
Այլընտրանքային նախագծեր խումբ
Հանրային տիրոյթում լայնօրէն տարածւում է Երաշխաւորուած խաղաղութեան գաղափարը, ինչն ակնյայտօրէն փլուզում է իշխանութեան «խաղաղութիւն, թէ պատերազմ» ծրագրային տոքսիկոզը։ Իշխանական հիստերիան հէնց սրանով է պայմանաւորուած։ Ընտրութիւններից դեռեւս 2,5 ամիս առաջ փլուզւում է հիմնական թեզը։
Մեր՝ հաւաքական ընդդիմութեան խնդիրն է հանգիստ կերպով ներկայացնել հանրութեանը «Երաշխաւորուած խաղաղութեան» կենսական անհրաժեշտութիւնը եւ բովանդակային իմաստը։
Մեզ պէտք է երաշխաւորուած խաղաղութիւն.
- Որ մեր կեանքը կախուած չլինի Ալիեւի տրամադրութիւնից եւ միանձնեայ որոշումներից,
- Որ այդ կերպ կոմպենսացուի ուժերի խախտուած հաւասարակշռութիւնը։
- Որ մեզ չասեն՝ եթէ չփոխէք սահմանադրութիւնը, պատերազմ կը լինի։
- Որ չասեն՝ 300 հազար ադրբեջանցիներ պէտք է «վերադառնան», հակառակ դէպքում լինելու է պատերազմ։
- Որ չասեն՝ Սեւանը «Գէոյչայ» է, հակառակ դէպքում լինելու է պատերազմ։
- Որ ամէն օր չհնչի Ալիեւի հերթական որեւէ այլ պահանջ, «հակառակ դէպքում լինելու է պատերազմ»։
Սա հանրութեանը բացատրելը բարդ չէ, բայց պէտք է նպատակային ու միասնական աշխատել։
Իշխանական սպեկուլացիայի սցենարի շարունակութիւնը թոյլ չտալու համար պէտք է մարդկանց բացատրել նաեւ, որ երաշխաւորուած խաղաղութիւնը.
ա. Չի ենթադրում խաղաղապահներ
բ. Չի ենթադրում միայն մէկ երկրի երաշխաւորութիւնը
Երաշխաւորուած խաղաղութիւնը միջազգային իրաւական մեխանիզմներով ամրագրուած, վերահսկողութեան ու պատասխանատւութեան յստակ գործիքներով ապահովուած պայմանաւորուածութիւնների համակարգ է։ Այն ներառում է միաժամանակ ե՛ւ արտաքին, ե՛ւ ներքին, ե՛ւ քաղաքական, ե՛ւ տնտեսական անվտանգութեան բաղադրիչներ։ Այն ներառում է այլընտրանքային ճանապարհների ու հաղորդակցութիւնների գործարկումը, նոր խոշոր տնտեսական եւ ենթակառուցուածքային ծրագրերի զուգահեռ իրականացումը։ Այն ենթադրում է նաեւ հասարակական կեանքի հանդարտութիւն եւ ներքին կայունութիւն՝ ներքին թշնամանքի բացառում, արդարադատութեան համակարգի առողջացում եւ այլ կարեւոր ասպեկտներ։
