Դիւանագէտների համահայկական խորհուրդը յայտարարութիւն է տարածել, որում ասւում է․
«Հայաստանի գործող վարչախումբն այսօր փորձել է անել այն, ինչ դարերով չի յաջողուել մեր թշնամիներին: Այդուհանդերձ, ի հակառակ հաւատացեալ հայ ժողովրդին նսեմացնելու եւ քաղաքացիական բախումներ հրահրելու, իշխանութիւնների բացայայտ քայլերի, ակնյայտ է աշխարհասփիւռ մեր ժողովրդի ճնշող մեծամասնութեան լիակատար ու անուէրապահ աջակցութիւնը Մայր Աթոռին եւ մեր հոգեւոր արժէքներին:
Վերջին օրերի շարունակական սանձարձակ յարձակումներն ուղղուած են ոչ միայն Վեհափառ Հայրապետի կամ որեւէ հոգեւորականի դէմ, այլեւ, ըստ էութեան, բացայայտ պատերազմ են մեր ազգային ինքնութեան, միասնականութեան եւ սրբութիւնների դէմ ու անթաքոյց ուղիղ հարուած են մեր պետականութեան հիմքերին:
Վերահաստատելով իր անսասան աջակցութիւնը Հայաստանեայց Առաքելական Սուրբ Եկեղեցուն, Դիւանագէտների համահայկական խորհուրդը յորդորում է ազգային ու պետականամէտ բոլոր ուժերին անյետաձգելիօրէն մշակել եւ գործի դնել ժողովրդի համախմբումն ապահովող քաղաքական յատուկ գործիքակազմ երկրում ներքին համերաշխութեան ու սահմանադրականութեան ապահովման եւ նոր իշխանութեան ձեւաւորման համար:
Պահն առաւել քան օրհասական է իւրաքանչիւրիցս պահանջում է անձնական բարձր պատասխանատուութիւն: Լռութիւնն այլեւս անթոյլատրելի է»:
