Երեւան: Մեդիամաքս: Ռուսաստանի փոխվարչապետ Ալեքսեյ Օվերչուկն այսօր ասել է, որ «ՌԴ-ն աջակցում է Հայաստանին Ադրբեջանի հետ «Թրամփի երթուղի» անուամբ տրանսպորտային միջանցք ստեղծելու ծրագրում, եթէ այն անհրաժեշտ է Երեւանին»։
«Մենք այս հարցը դիտարկում ենք այս հարթութեան վրայ։ Հայաստանը մեր ռազմավարական դաշնակիցն է, եւ եթէ Հայաստանը կարծում է, որ իրենց համար ինչ-որ բան լաւ է, ապա, իհարկէ, մենք այստեղ աջակցում ենք Հայաստանին։
Եթէ նրանք կարծում են, որ Վաշինգտոնում համապատասխան հռչակագրի ստորագրումն ապահովում է անվտանգութեան աւելի մեծ երաշխիքներ, ապա դա լաւ է, քանի որ մենք նաեւ աջակցում ենք Հարաւային Կովկասում խաղաղութեան գործընթացներին»,- ՏԱՍՍ-ի փոխանցմամբ՝ ասել է ՌԴ փոխվարչապետը։
Նրա խօսքով՝ սա «ամբողջութեամբ համապատասխանում է Ռուսաստանի շահերին»։
Ալեքսեյ Օվերչուկը նշել է նաեւ, որ մօտ ապագայում ՀՀ վարչապետ Նիկոլ Փաշինեանը կայցելի Ռուսաստան։
