Մի շարք հասարակական կազմակերպութիւններ դատապարտել են Դաւիթ Մինասեանի կալանաւորումը` որպէս խափանման միջոց ընտրելու վերաբերեալ որոշումը։ Յայտարարութիւնը ատորեւ.
Մենք՝ ներքոստորագրեալ հասարակական կազմակերպութիւններս, խստօրէն դատապարտում ենք եւ մեր մտահոգութիւնն ենք յայտնում Դաւիթ Մինասեանի նկատմամբ կալանաւորումը` որպէս խափանման միջոց ընտրելու վերաբերեալ։
2026 թ. մարտի 29-ին Երեւանի Սուրբ Աննայ եկեղեցում ՀՀ վարչապետ Նիկոլ Փաշինեանի մասնակցութեամբ միջադէպի արդիւնքում յարուցուած քրէական վարոյթով Դաւիթ Մինասեանի նկատմամբ հանրային քրէական հետապնդում է յարուցուել «խուլիգանութեան եւ պաշտօնատար անձի օրինական ծառայողական կամ քաղաքական գործունէութեանը միջամտելը» յանցակազմերով։ Նրա նկատմամբ Երեւան քաղաքի առաջին ատեանի ընդհանուր իրաւասութեան քրէական դատարանի դատաւոր Մնացական Մարտիրոսեանի կողմից կիրառուել է կալանաւորումը որպէս խափանման միջոց՝ երկու ամիս ժամկէտով։
Դաւիթ Մինասեանը 18 տարեկան է, դեռեւս դպրոցական։ Ծնողի ու փաստաբանների հրապարակած տեղեկութիւնների համաձայն՝ նա ունի առողջական խնդիրներ, այդ թւում՝ ազատազրկման հետ անհամատեղելի։ Նման պայմաններում կալանաւորումը նրա նկատմամբ ընտրուել եւ կիրառւում է կամայականօրէն՝ առանց բաւարար հիմնաւորման եւ համաչափութեան սկզբունքի պահպանման` որպէս պատիժ, ինչպէս նաեւ վախի մթնոլորտ տարածելով հասարակութեան շրջանում։
Աւելին, անազատութեան մէջ գտնուելու երկու օրուայ ընթացքում նրա ինքնազգացողութիւնը վատացել է, Դաւիթը կորցրել է գիտակցութիւնը, ունեցել շնչահեղձութիւն։ Ներկայումս գտնւում է Նաիրի ԲԿ-ի վերակենդանացման բաժանմունքում։
Հաշուի առնելով վերոգրեալը եւ Հայաստանի Հանրապետութեան մարդու իրաւունքների պարտաւորութիւնները, այդ թւում՝ ազատութեան իրաւունքի եւ անմարդկային վերաբերմունքի չենթարկուելու իրաւունքի ապահովման հրամայականը, ինչպէս նաեւ կրթութեան իրաւունքի պատշաճ ապահովման անհրաժեշտութիւնը՝ պահանջում ենք.
ՀՀ գլխաւոր դատախազից՝
Անյապաղ վերացնել Դաւիթ Մինասեանի խափանման միջոց կալանաւորումը։
ՀՀ քննչական կոմիտեից եւ դատախազութիւնից՝
իրականացնել Սուրբ Աննայ Եկեղեցում տեղի ունեցած միջադէպի անկախ, անաչառ քննութիւն՝ երաշխաւորելով վարոյթում ներգրաւուած բոլոր անձանց իրաւունքները, ինչպէս նաեւ
իրականացնել միջադէպի բազմակողմանի քննութիւն՝ պարզելով միջադէպի բոլոր հանգամանքները, այդ թւում՝ Դաւիթ Մինասեանի ենթադրեալ արարքին նախորդող հանգամանքներն ու պատճառները, ինչպէս նաեւ քրէաիրաւական գնահատական տալով վարչապետ Փաշինեանի անվտանգութիւնն ապահովող ՊՊԾ ծառայողի կողմից Դաւիթ Մինասեանի նկատմամբ ֆիզիկական ներգործութեան դրուագին,
Հանրային պաշտօն զբաղեցնող բոլոր անձանցից՝
ձեռնպահ մնալ Դաւիթ Մինասեանի անմեղութեան կանխաւարկածը խախտող, վիրաւորական եւ արժանապատուութիւնը ոտնահարող հանրային խօսքից։
Իրաւունքների պաշտպանութիւն առանց սահմանների ՀԿ
Արդարութեան նոր մշակոյթ ՀԿ
«Հելսինկեան ասոցիացիայ» ԻՀԿ
«Հաշմանդամութիւն ունեցող անձանց իրաւունքների օրակարգ» ՀԿ
Լրագրողներ Հանուն Մարդու Իրաւունքների ՀԿ
«Հայ առաջադէմ երիտասարդութիւն» ՀԿ
Երեւանի մամուլի ակումբ
Հանրային լրագրութեան ակումբ
«ԳորիսԼԱԲ» համայնքային զարգացման կենտրոն ՀԿ
Դիգնիթի ՀԿ
Աւելացնենք, որ նախքան նիկոլական ռեժիմի հաստատումը շատ ՀԿ կոչուած կազմակերպութիւններ նման դատապարտանքի յայտարարութիւններով անխնայ հանդէս էին գալիս ցանկացած դէպքի ժամանակ, սակայն դրանցից շատերը այսօր կամ լուռ են կամ մաս են կազմում բռնապետական իշխանութեան:
