Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի նախագահութեամբ յունուարի 27-ին Մայր Աթոռ Սուրբ Էջմիածնում տեղի ունեցաւ Գերագոյն հոգեւոր խորհրդի ժողով։ Նիստը վարեց Վանական խորհրդի ատենապետ Տ. Նաթան արքեպիսկոպոս Հովհաննիսեանը։
ԳՀԽ ժողովը բացուեց Տերունական աղօթքով, որից յետոյ Վեհափառ Հայրապետն իր գնահատանքն ու օրհնութիւնը բերեց Գերագոյն հոգեւոր խորհրդի անդամներին։ Ժողովի օրակարգում ընդգրկուած էին Եկեղեցու կանոնական, վարչական, կագապահական խնդիրներին առնչուող հարցեր։
Ապօրինի ազատազրկուած եկեղեցականների, ազգային բարերարի նկատմամբ նախաձեռնուած քրէական վարոյթների, դատավարական գործընթացների եւ կայացուած դատաւճիռների, ինչպէս նաեւ հոգեւորականների նկատմամբ իրականացուող բռնաճնշումների վերաբերեալ զեկոյցներով հանդէս եկան փաստաբան, ի․գ․թ․ Արայ Զոհրաբեանը, փաստաբաններ Արսէն Բաբայանը եւ Հովհաննես Խուդոյեանը։
Արձանագրուեց, որ եկեղեցականների նկատմամբ առաջադրուած մեղադրանքները եւ կիրառուած խափանման միջոցները հիմնուած են ոչ իրաւաչափ փաստէրի վրայ եւ իրաւական առումով չէն բխում օրինականութեան ու արդար դատաքննութեան հիմնարար սկզբունքներից, կրում են ընտրովի եւ խտրական բնոյթ։
Գերագոյն հոգեւոր խորհուրդը խստօրէն դատապարտեց ծառայութիւն իրականացնող հոգեւորականների նկատմամբ գործադրուող ճնշումները, արձանագրեց, որ դրանք ՀՀ Սահմանադրութեան եւ օրէնսդրութեան ակնյայտ խախտումներ են, որոնք ունեն շարունակուող մտահոգիչ միտումներ։
Ժողովականները մերժելի նկատեցին պետական եւ իրաւապահ մարմինների ներգրաւմամբ իրականացուող ապօրինի գործողութիւնները եւ Եկեղեցու ներքին կեանքին հակասահմանադրական միջամտութիւնները։
Գերագոյն հոգեւոր խորհուրդը իր գնահատանքը յայտնեց փաստաբաններին՝ նրանց հետեւողական աշխատանքի՝ եկեղեցականների ու ազատազրկուած հաեորդիների իրաւունքների պաշտպանութեան գործում ներդրած կարեւոր ջանքերի համար։
Գերագոյն հոգեւոր խորհուրդը քննութեան առաւ Մասեացոտնի թեմի նախկին առաջնորդ Տ․ Գեւորգ եպս․ Սարոյեանի կարգազանց ընթացքը։
Արձանագրուեց, որ վերջինս վիճարկելով թեմակալ առաջնորդի պաշտօնից ազատուելու եւ Մայրաւանք վերադառնալու Հայրապետական տնօրինութիւնը, փաստացի դրժել է հնազանդութեան իր ուխտը եւ դատական հայց ներկայացրել ընդդէմ Սուրբ Էջմիածնի՝ պահանջելով վերականգնել առաջնորդական իր հանգամանքը։
Գերագոյն հոգեւոր խորհուրդը, անդրադարձ կատարեց նաեւ Գեւորգ եպիսկոպոսի հրապարակային ելոյթներում եւ յայտարարութիւններում Մայր Աթոռ Սուրբ Էջմիածնի, իր ծառայակից եկեղեցականների եւ Ամենայն Հայոց Կաթողիկոսի հասցէին հնչեցրած զրպարտիչ մեղադրանքներին, խստօրէն դատապարտեց նման վարքագիծը՝ այն գնահատելով եկեղեցական կարգի, կանոնական հնազանդութեան ու եկեղեցական միաբանութեան սկզբունքների կոպիտ խախտում եւ առաջարկ ներկայացրեց Ամենայն Հայոց Կաթողիկոսին Տ․ Գեւորգ եպս․ Սարոյեանին հռչակել կարգալոյծ։
Ազգային ժողւում եկեղեցուն առնչուող օրինագծերի մասին զեկոյցով հանդէս եկաւ ի.գ.դ., պրոֆէսոր տիար Գեւորգ Դանիելեանը։ Մասնաւորապէս, անդրադարձ կատարուեց հողային եւ պատմամշակութային յուշարձանների վերաբերեալ օրէնսդրական նախաձեռնութիւններին, որոնք հակասում են գործող քաղաքացիական եւ ոլորտային օրէնսդրութեան հիմնադրոյթներին, խախտում են սեփականութեան իրաւունքի հիմնարար սկզբունքները եւ ստեղծում են անհիմն ենթադրութիւններ, իբր Հայ Եկեղեցու կողմից պաշտամունքային յուշարձանների օտարման վտանգի մասին։ Զեկոյցում ընդգծուեց, որ յիշեալ օրէնսդրական նախաձեռնութիւնները, որոնք չունեն իրական իրաւակարգաւորիչ անհրաժեշտութիւն, ուղղուած չէն սրբավայրերի եւ հոգեւոր-մշակութային յուշարձանների անաղարտ պահպանութեան խնդիրներին, չէն լուծում որեւէ շօշափելի հանրային խնդիր եւ հիմնականում ծառայում են հակաեկեղեցական տրամադրութիւնների ձեւաւորմանն ու խորացմանը։ ԳՀԽ դիրքորոշումն է, որ ընդհանրապէս արգելուի պաշտամունքային յուշարձանների օտարումը՝ անկախ սեփականութեան ձեւից։
Ժողովի ընթացքում անդրադարձ կատարուեց նաեւ Աւստրիայի Սանկտ Փեօլթըն քաղաքում Ամենայն Հայոց Կաթողիկոսի կողմից հրաւիրուած Եպիսկոպոսաց ժողովի կազմակերպման հարցերին։ Որոշուեց ձեւաւորել կազմակերպիչ յանձնախումբ՝ ժողովի նախապատրաստական եւ կազմակերպչական աշխատանքները համակարգելու նպատակով։
Գերագոյն հոգեւոր խորհրդի ժողովն աւարտուեց Ամենայն Հայոց Կաթողիկոսի օրհնութեան խօսքով եւ «Պահպանիչ» աղօթքով:
Սոյն թուականի յունուարի 27-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը, ընդառաջ Գերագոյն Հոգեւոր Խորհրդի 27․01․2026թ․ որոշման, հայրապետական տնօրինութեամբ կարգալոյծ է հռչակել Տ․ Գեւորգ եպիսկոպոս Սարոյեանին։
Կարգալուծութեան համար ի մասնաւորի հիմք է ծառայել, որ նա վիճարկել է Մասեացոտնի թեմի առաջնորդի պաշտօնից ազատուելու եւ Մայրաւանք վերադառնալու վերաբերեալ Հայրապետական տնօրինութիւնը՝ խոչընդոտելով Մասեացոտնի թեմի բնականոն գործունէութիւնը եւ դատական իր հայցով առիթ ու պայման ստեղծել իշխանութեան պատկան կառոյցների կողմից ներէկեղեցական կեանքին միջամտելու համար։
Գեւորգ եպս․ Սարոյեանը կանոնական շեղումներով եւ կարգազանց գործողութիւններով դրժել է հնազանդութեան ուխտը։
Կարգալոյծ եկեղեցականն այսուհետ կդասուի աշխարհականների շարքին՝ Արման Սարոյեան աւազանի անունով։
