«Բարգաւաճ Հայաստան» կուսակցութեան կալանաւորուած նախագահ Գագիկ Ծառուկեանը յայտարարութիւն է տարածել, որում մասնաւորապէս ասւում է.
«Շնորհակալութիւն եմ յայտնում հանրային գործիչների այն մեծ ու հեղինակաւոր խմբին, որոնք հանդէս եկան ինձ աջակցող յայտարարութեամբ։ Նման քայլը երբեք չի մոռացւում։
Ձեզնից ոմանց հետ անձամբ եմ ծանօթ, ոմանց հետ եղել ենք Քրիստոսի արձանի շինհրապարակում, շատերիդ անձամբ չեմ ճանաչում, բայց վստահ եմ, որ դա անպայման տեղի կ՛ունենայ։
Անկեղծ ասած, առաջին միտքը, որ ծագեց իմ մօտ ձեր յայտարարութիւնը լսելուց յետոյ, հետեւեալն էր. ինչպէ՞ս կարող է մի ազգ ունենալ այսքան հանրայայտ, հեղինակաւոր դէմքեր, իրենց բնագաւառներում լուրջ յաջողութիւնների հասած մարդիկ, իսկ մեր երկիրը գտնուի այս վիճակում։
Մեր ժողովուրդը շատ մեծ ներուժ ունի։ Մենք կարող ենք ուղղել մեր մէջքը, վերականգնել մեր ինքնավստահութիւնը։ Մենք աշխարհին շատ բան ունենք ասելու՝ թէ՛ մշակոյթի, թէ՛ գիտութեան, թէ՛ մարմնակրթութեան եւ ընդհանրապէս բոլոր բնագաւառներում։
Այս օրերին ինձ համար ամենացաւալին այն է, որ ինձ հետ կապուած բոլոր ձեռնարկութիւններում մարդիկ զրկուել են աշխատանքի գնալու եւ իրենց օրուայ հացը վաստակելու հնարաւորութիւնից։ Աշխատող, բարիք ստեղծող ձեռնարկութիւնները կանգնեցուել են։ Հասկանո՞ւմ էք, թէ դա ինչպիսի հարուած է ամբողջ գործարար ոլորտի համար՝ երկրի մասշտաբով, եւ ինչպիսի հարուած է ազնիւ աշխատանքով ապրող մարդկանց համար։
Իմ նկատմամբ յարուցուած անարդար գործը որեւէ առնչութիւն չունի այդ հիմնարկների հետ։ Բոլորը գիտեն, որ ես վաղուց դուրս եմ եկել այդ ձեռնարկութիւնների կառավարումից, որեւէ կապ չունեմ դրանց ընթացիկ հարցերի հետ եւ չեմ միջամտել նրանց աշխատանքներին։
Այնուամենայնիւ, բոլորին յայտնի է նաեւ, որ այդ ձեռնարկութիւնների ապօրինի կասեցումն արւում է ինձ ցաւ պատճառելու համար։ Յոյս եմ յայտնում, որ ի վերջոյ բանականութիւնը կը յաղթի, եւ այդ ձեռնարկութիւնների աշխատանքին այլեւս չեն խոչընդոտի։ Այս ձեռնարկութիւններն աշխատանքով ապահովում են հազարաւոր մարդկանց, իսկ դրանց հետ համագործակցում են տասնեակ հազարաւոր գործընկերներ, որոնց գործունէութիւնը նոյնպէս մեծապէս տուժում է։ Այս ամէնը լուրջ վնաս է հասցնում թէ՛ աշխատող քաղաքացիներին, թէ՛ մեր երկրին ընդհանրապէս։
Այս օրերին մտքով շատ յաճախ լինում եմ Քրիստոսի արձանի շինհրապարակում։ Ամէն քար, ամէն աստիճան, ամէն մետր ինձ համար թանկ ու կարեւոր է։
Վերջերս մտածում էի, որ ժամանակն է ստեղծելու արձանի բացման արարողութեան աշխատանքային խումբ։ Նախատեսում եմ, որ բացմանը ներկայ կը գտնուեն հեղինակաւոր հիւրեր աշխարհի տարբեր երկրներից, հանրայայտ դէմքեր, միջազգային հեղինակութիւն ունեցող գործիչներ, պաշտօնական պատուիրակութիւններ, իմ երկրի ու ժողովրդի բարեկամներ, տարբեր ազգերի եւ կրօնների ներկայացուցիչներ։
Ասեմ նաեւ, որ արդէն ունեմ բազմաթիւ հեղինակաւոր անձանց հաւաստիացումները, որ նրանք կը գան մեր երկիր՝ տեսնելու աշխարհի նոր հրաշալիքներից մէկը։ Այս ամէնը պէտք է մշակել, ծրագրել, քննարկել ու բանակցել։ Մի խօսքով՝ շատ աշխատանք կայ կատարելու։ Աստուծոյ կամօք, ամէն ինչ կը կատարուի։
Ես ունեմ այն խոր եւ անխախտելի զգացողութիւնը, որ այդ արձանի կառուցումը մեր երկրի համար նոր, լուսաւոր շրջան է բացելու։ Այդ արձանը պէտք է Հայաստանի համար բացի նոր էջ, նոր յաջողութիւն։ Այն պէտք է դառնայ մեր ներքին համերաշխութեան, ազգային վերածննդի եւ աշխարհին ներկայանալու մեր նոր խորհրդանիշը»։
