Փետրուարի 20-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց տարբեր երկրներից ժամանած Հայ Յեղափոխական Դաշնակցութեան ղեկավար մարմինների ներկայացուցիչներին՝ գլխաւորութեամբ ՀՅԴ Բիւրոյի ներկայացուցիչ Արմէն Ռուստամեանի:
Նորին Սրբութիւնն իր օրհնութիւնն ու գնահատանքը բերեց ներկաներին ազգանուէր իրագործումների առնչութեամբ՝ պատգամելով շարունակել ջանքեր գործադրել հայրենիքի զօրացման, ազգի զաւակների արժանապատիւ ու ապահով կեանքի կերտման եւ մերօրեայ մարտահրաւէրների յաղթայարման ուղղութեամբ։
Հանդիպմանն անդրադարձ կատարուեց ազգային-եկեղեցական կեանքը յուզող խնդիրներին, իշխանութեան կողմից իրականացուող հակաեկեղեցական գործողութիւններին, ինչը խաթարում է եկեղեցականների բնականոն առաքելութիւնը եւ հաւտացեալների հոգեւոր կեանքը։
Նորին Սրբութիւնը հաստատեց, որ հակառակ բոլոր դժուարութիւնների Եկեղեցին եւ հոգեւոր դասն անշեղօրէն շարունակելու են իրենց հոգեփրկչական ու ազգապահպան առաքելութիւնը` ի նպաստ հայոց կեանքի պայծառութեան եւ բարօրութեան:
Պատուիրակութեան անդամներն իրենց զօրակցութիւնը յայտնեցին Մայր Աթոռ Սուրբ Էջմիածնին եւ Վեհափառ Հայրապետին՝ կարեւորելով Հայոց Եկեղեցու դարաւոր աւանդն ու առաքելութիւնը հայոց պետականութեան զօրացման եւ ազգային ինքնութեան պահպանման գործում։
