ՍՏԵՓԱՆԱԿԵՐՏ, 31 ՄԱՅԻՍԻ, ԱՐՄԵՆՊՐԵՍ: Արցախի արտաքին գործերի նախարարութիւնը խորը հիասթափութիւն եւ տարակուսանք առաջացնող է որակել ԱՄՆ Պետքարտուղարութեան պաշտօնական ներկայացուցչի մայիսի 30-ի յայտարարութիւնը, որում նա ողջունել է Արցախի (Լեռնային Ղարաբաղի) բնակիչների, այսպէս կոչուած, համաներման հարցը դիտարկելու պատրաստակամութեան մասին Ադրբեջանի նախագահի վերջին յայտարարութիւնները։ «Արմենպրես»-ն այս մասին տեղեկացաւ Արցախի Հանրապետութեան արտգործնախարարութեան մեկնաբանութիւնից։
Մեկնաբանութեան մէջ նաեւ նշուած է. «Անբացատրելի է, թէ ինչպէս կարելի է ամբողջութեամբ բացայայտ շանտաժի եւ պարտադրանքի վրայ հիմնուած Ադրբեջանի նախագահի այդ յայտարարութեան մէջ խրախուսանքի արժանի որեւէ դրական տարր գտնել։ Ակնյայտ է, որ Ադրբեջանի նախագահի յայտարարութեան հիմնական ուղերձը կայանում էր նրանում, որ Ադրբեջանը հրաժարւում է Արցախի Հանրապետութեան ժողովրդավարական ճանապարհով ընտրուած իշխանութիւնների հետ հաւասար երկխօսութիւնից եւ առաջնորդւում է միայն իր իշխանութիւնն Արցախի ժողովրդին ուժով պարտադրելու ցանկութեամբ։
Կասկածներ չունենք, որ ԱՄՆ-ն ցանկութիւն ունի դրական դեր խաղալ ադրբեջանայ-ղարաբաղեան հակամարտութեան արդար, հաւասարակշռուած ու արժանապատիւ կարգաւորման եւ տարածաշրջանում երկարաժամկէտ խաղաղութեան հասնելու գործում։ Միեւնոյն ժամանակ, գտնում ենք, որ Բաքուի ապակառուցողական եւ ռազմատենչ քաղաքականութեան խրախուսումը հակասում է հակամարտութեան խաղաղ կարգաւորման հարցում դրական փոփոխութիւնների հասնելու ցանկութեանը»։
