Հաղորդւում է, որ All-ASA-ն սեպտեմբերի 23-ին Նիւ Եորքում Նիկոլ Փաշինեանի հետ մասնաւոր հանդիպում է կազմակերպում՝ միաժամանակ իր անդամներին յայտնելով, թէ այն չպէտք է դիտարկել որպէս քաղաքական միջոցառում։ Դա վիրաւորական է այն ուսանողների համար, որոնց այս կազմակերպութիւնը հաւակնում է, թէ ներկայացնում է։
Հանդիպումը տեղի է ունենում Ադրբեջանի կողմից Արցախի հայութեան էթնիկ զտման երրորդ տարելիցից ընդամէնը մի քանի օր անց։ 2023 թուականի սեպտեմբերին Ադրբեջանի յարձակումից յետոյ աւելի քան 100,000 հայ բռնի տեղահանուեց։ Սեպտեմբերի 18-ին, ստանալով Հեսսենի խաղաղութեան մրցանակը, Փաշինեանը յայտարարեց, որ Ադրբեջանի նախագահ Իլհամ Ալիեւը նոյնպէս հաւասարապէս արժանի էր այդ մրցանակին։ Ինչպէ՞ս կարող է All-ASA-ն նրա հետ մասնաւոր հանդիպումն անուանել ապաքաղաքական։
Հաղորդումների համաձայն՝ առարկութիւնները հնչում են հէնց All-ASA-ի սեփական ցանցի ներսից։ Մի շարք համալսարանների Հայ ուսանողական միութիւններ նամակներ են յղել կազմակերպութեան Գործադիր խորհրդին՝ դէմ արտայայտուելով հանդիպմանը, իսկ խորհրդի մի քանի անդամներ, ըստ հաղորդումների, հրաժարական են տուել։ Նրանց առարկութիւնները պէտք է աւելի մեծ նշանակութիւն ունենան, քան Փաշինեանի հետ հանդիպելու հնարաւորութիւնը։
Հանդիպման ձեւաչափը եւս հարցեր է առաջացնում։ Ըստ հաղորդումների՝ ուսանողները չեն ունենալու ուղիղ եթերում հարցեր տալու հնարաւորութիւն։ Հարցերը պէտք է նախապէս ներկայացուեն եւ անցնեն ընտրութեան գործընթաց։ Ո՞րն է ուսանողներին Փաշինեանի հետ դէմ առ դէմ հանդիպեցնելու իմաստը, եթէ նրանք չեն կարող ուղղակիօրէն հարցեր ուղղել նրան։ Վերահսկուող հարցուպատասխանը դժուար թէ կարելի է երկխօսութիւն համարել։
All-ASA-ն յայտարարում է, որ ներկայացնում է աւելի քան 50 Հայ ուսանողական միութիւն եւ ունի Ղեկավար խորհուրդ, որը կոչուած է ուղղորդելու կազմակերպութեան ղեկավարութեանը։ Այն պէտք է հրապարակի, թէ ով է հաւանութիւն տուել հանդիպմանը, համալսարանական որ միութիւնների հետ են խորհրդակցել եւ արդեօք Ղեկավար խորհուրդը քննարկել է այդ որոշումը։
Սա All-ASA-ի հետ կապուած ուսանողների եւ Հայաստանի պետական պաշտօնեայի մասնակցութեամբ փակ հանդիպման մասին առաջին հաղորդումը չէ։ Նախկինում տեղեկութիւններ էին հրապարակուել Լոս Անջելեսում Սփիւռքի գործերի գլխաւոր յանձնակատար Զարեհ Սինանեանի հետ հանդիպման մասին։ Ինչո՞ւ է կրկին նախապատուութիւն տրւում փակ հանդիպումներին։
Հայաստանում քաղաքական բանտարկեալները շարունակում են մնալ անազատութեան մէջ։ Փաշինեանը պայքար է մղում Հայ Եկեղեցու դէմ եւ առաջ է մղում Սփիւռքի նկատմամբ բացասական ազդեցութիւն ունեցող օրէնքներ։ Նա դարձել է աշխարհասփիւռ հայութեան շրջանում ամենապառակտիչ քաղաքական գործիչներից մէկը։ Նրան փակ, նախապէս զտուած հարցերով լսարան տրամադրելն ու դա «ապաքաղաքական» անուանելը ինքնին քաղաքական դիրքորոշում է։ All-ASA-ն պէտք է յստակեցնի իր դիրքորոշումը կամ փոխի իր ընթացքը։
Համահայկական ուսանողական միութիւնը (All Armenian Student Association՝ All-ASA) Միացեալ Նահանգների ամենամեծ հայկական ուսանողական կազմակերպութիւնն է։ 2003 թուականից ի վեր All-ASA-ն հայ ուսանողներին կապում է իրենց ազգային դատին, համայնքին եւ մշակոյթին։
301.am
