Ծառուկեանը պէտք է օր առաջ լինի ազատութեան մէջ․ յայտարարութիւն
Գագիկ Ծառուկեանի եւ անազատութեան մէջ գտնուող քաղբանտարկեալների պաշտպանութեան հանրային խորհուրդը յայտարարութիւն է տարածել․
«Այսօր կայանալու է Գագիկ Ծառուկեանի գործով դատավարութիւնը։ Արդէն չորս ամիս է, ինչ Գագիկ Ծառուկեանն ապօրինի ազատազրկուած է՝ կեղծ մեղադրանքների հիման վրայ յարուցուած քրէական գործով։
Փաստաբանական խմբի մանրամասն պարզաբանումներից եւ հրապարակուած տեսանիւթերից պարզ է դառնում, որ ամբողջ պատմութեան մէջ տուժողը հէնց Գագիկ Ծառուկեանն է, եւ հէնց նրա հանդէպ է քրէօրէն պատժելի արարք կատարուել։
Գագիկ Ծառուկեանը պէտք է օր առաջ լինի ազատութեան մէջ։ Արդարադատութեան համակարգից միակ ակնկալիքը սա է։ Մենք պահանջում ենք ազատութիւն՝ Գագիկ Ծառուկեանի, ինչպէս նաեւ կեղծ մեղադրանքների հիման վրայ յարուցուած քրէական գործերով բոլոր հետապնդուողների համար։
Մենք շարունակելու ենք մեր պայքարը՝ ակտիւօրէն աշխատելով ոչ միայն տեղական, այլեւ միջազգային իրաւապաշտպան կառոյցների, լրատուամիջոցների, ակտիւիստների, համաշխարհային հեղինակութիւն վայելող գործիչների հետ՝ մեծացնելով միջազգային հետաքրքրութիւնն այս գործի եւ ընդհանրապէս Հայաստանում իրականացուող ընտրովի արդարադատութեան խնդրի նկատմամբ։
Ազատութի՛ւն Գագիկ Ծառուկեանին եւ միւս քաղբանտարկեալներին»,– ասուած է յայտարարութեան մէջ։
