Արեւմտեան Ամերիկայի Հայ Դատի Յանձնախումբը դիմել է Լոս Անջելեսի եւ Քալիֆորնիայի իշխանութիւններին՝ պահանջելով Թուրքիայի նախագահ Ռեճեփ Թայիփ Էրտողանին ոչ մի պաշտօնական ընդունելութիւն չցուցաբերել։ Ըստ տեղեկութիւնների՝ Թուրքիայի նախագահը մտադիր է այցելել Հարաւային Քալիֆորնիա՝ Յունիսի 25-ին ԱՄՆ-ի եւ Թուրքիայի միջեւ Աշխարհի առաջնութեան խաղի կապակցութեամբ։
Հայ Դատը յիշեցնում է՝ հենց Էրտողանն է կանգնած Հայոց Ցեղասպանութիւնը ժխտելու Թուրքիայի բազմամեայ ջանքերի հետեւում։ Բացի այդ, Անկարան ուղղակի ռազմական աջակցութիւն է ցուցաբերել Ադրբեջանին Արցախի էթնիկ զտման ընթացքում։
«Ոչ մի կարմիր գորգ, ոչ մի բեմադրուած ժպիտ, ոչ մի լուսանկարահանման հնարաւորութիւն ցեղասպանութիւնը ժխտողի համար, ով զէնք է դարձրել Արցախի էթնիկ զտումները եւ այն անուանում է հպարտութեան առարկայ։ Լոս Անջելեսը դեկորացիայ չի դառնայ նրա վերականգնողական շրջագայութեան համար», — յայտարարել է Արեւմտեան Ամերիկայի Հայ Դատի Յանձնախմբի նախագահ Օշին Յարութիւնեանը։
Հայ Դատը կոչ է անում տեղական պաշտօնեաներին հրապարակաւ յայտարարել Էրտողանի որեւէ ընդունելութիւնից հրաժարուելու մասին, խուսափել թուրքական պատուիրակութեան հետ որեւէ արարողակարգային շփումից, խուսափել համատեղ լուսանկարներից եւ հանդէս գալ հայ-ամերիկեան համայնքին սատարող յայտարարութիւններով։ Կազմակերպութեան ներկայացուցիչների խօսքով՝ համապատասխան նամակներն արդէն ուղարկուել են քաղաքային, տարածաշրջանային եւ դաշնային իշխանութեան մարմիններին։
Հայոց Ցեղասպանութիւնը՝ մօտ 1.5 միլիոն հայերի համակարգուած ոչնչացումն ու տեղահանութիւնը Օսմանեան կայսրութեան կողմից 1915-1923 թուականներին, պաշտօնապէս ճանաչուել է ԱՄՆ կառավարութեան, Քալիֆորնիա նահանգի, ինչպէս նաեւ Լոս Անջելես քաղաքի եւ շրջանի կողմից։ Թուրքիան շարունակում է հերքել իր մասնակցութիւնը։
