Այս լուրի կապակցութեամբ մինչ հիմա ոչ մի փաստացի հաստատում կամ պաշտօնական հերքում չի կատարուել:
«Օրակարգ»
Lիա Սարգսեան
«Իշխանութեան» լրատուականի ձեռքի տակ է յայտնուել Սահմանադրութեան նոր տեքստը:
«Իշխանութիւն» լրատուականի ձեռքի տակ է յայտնուել ՀՀ Սահմանադրութեան փոփոխուած տարբերակը*։ Տեքստում կարմիրով տողերն աւելացուածներն են, իսկ ջնջուածները՝ Սահմանադրութիւնից հեռացուած տողերը։
ՀՀ Սահմանադրութիւնում արուած փոփոխութիւնները հարուածի տակ են դնում ժողովրդի հիմնարար արժէքները՝ պատմութիւնը, ընտանիքի ինստիտուտը, սփիւռքի հետ կապը եւ հայ լինելու առաջնահերթութիւնը Հայաստանում։ Բայց ամենազաւեշտալին այն է, որ պետութեան արժեհամակարգը խարխլող փոփոխուած Սահմանադրութիւնը ներկայացւում է «եւրոպական արժէքների» գեղեցիկ փաթեթաւորմամբ։
Այսպէս, Սահմանադրութեան նախաբանում «պատմական յիշողութիւնը ջնջուած» է։ Անկախութեան հռչակագրի մասին որեւէ յիշատակում անգամ չկայ, մինչդեռ գործող Սահմանադրութիւնը հիմնուած է Անկախութեան հռչակագրի վրայ։ Հռչակագրում ասւում էր․ «Հայ ժողովուրդը, հիմք ընդունելով Հայաստանի անկախութեան մասին հռչակագրում հաստատագրուած հաեօց պետականութեան հիմնարար սկզբունքները եւ համազգային նպատակները, իրականացրած ինքնիշխան պետութեան վերականգնման իր ազատասէր նախնիների սուրբ պատգամը… ընդունում է Հայաստանի Հանրապետութեան Սահմանադրութիւնը»։
Այս յղումը հանուել է նոր Սահմանադրութեան տեքստից եւ փոխարինուել է հետեւեալ տողերով․ «Հայաստանի Հանրապետութեան ժողովուրդը, առաջնորդուելով Հայաստանի Հանրապետութեան անկախութեան, ինքնիշխանութեան եւ պետականութեան շարունակականութեան պահպանման, մարդու իրաւունքներն ու ազատութիւնները պաշտպանելու, ժողովրդավարական եւ իրաւական պետութիւնն ամրապնդելու, ժողովրդի անվտանգութիւնն ապահովելու եւ ընդհանուր բարեկեցութիւնը խթանելու նպատակներով, ինչպէս նաեւ ապագայ սերունդներին խաղաղ, անվտանգ եւ բարեկեցիկ հայրենիք ժառանգելու յանձնառութեամբ, ընդունում է Հայաստանի Հանրապետութեան Սահմանադրութիւնը»։
Անկախութեան հռչակագիրը ՀՀ Սահմանադրութիւնից պոկելը Ալիեւի պահանջն էր, քանի որ այնտեղ Արցախի մասին յիշատակում կար, եւ խօսւում էր պատմական հայրենիքի ու հողերի վերականգնման մասին։
Նոր Սահմանադրութեան մէջ ջնջուած է 35-րդ յօդուածի 2-րդ կէտը, որտեղ ասւում էր, որ ամուսնանալիս, ամուսնութեան ընթացքում, ամուսնալուծուելիս կինը եւ տղամարդն ունեն հաւասար իրաւունքներ։ Այս յօդուածի փոփոխութիւնը ենթադրում է, որ փոխւում է աւանդական հայ ընտանիքի մոդելը, եւ որ ընտանիք կարող է համարուել նաեւ նոյնասեռ անձանց միութիւնը։
Ծնողների իրաւունքները եւ պարտականութիւնները սահմանող 36-րդ յօդուածն այնպէս է փոխուել, որ երեխաներն այլեւս պարտաւորութիւն չունեն խնամել իրենց տարէց ծնողներին։ Այս յօդուածի 3-րդ կէտը սահմանում էր․ «Չափահաս աշխատունակ անձինք պարտաւոր են հոգ տանել իրենց անաշխատունակ եւ կարիքաւոր ծնողների մասին։ Մանրամասները սահմանւում են օրէնքով»։ Սա ամբողջութեամբ հանուել է։
Նոր Սահմանադրութեամբ ազգութեամբ հայ մարդը պարզեցուած կարգով այլեւս չի կարող դառնալ ՀՀ քաղաքացի։ Ամբողջութեամբ ջնջուած են Հայաստանի Հանրապետութեան քաղաքացիութեան իրաւունքը սահմանող 47-րդ յօդուածի 2-րդ, 3-րդ եւ 4-րդ կէտէրը։ Սա նշանակում է, որ մեր սփիւռքահայերը այլեւս պարզեցուած կարգով չէն կարող դառնալ ՀՀ քաղաքացի։
Սահմանադրութիւնից ամբողջութեամբ ջնջուած է 113-րդ յօդուածը, որը իրաւունք էր տալիս ԱԺ պատգամաւորներին գրաւոր հարցապնդումներով դիմել Կառաւարութեան անդամներին, այդ թւում՝ վարչապետին, այլ կերպ ասած՝ պահանջել թափանցիկութիւն եւ հաշուետուողականութիւն։ Նոր Սահմանադրութեամբ խորհրդարանական վերահսկողութիւնը թուլանում է, եւ քաղաքական համակարգը կարծես դառնում է միապետական։ Նպատակը պարզ է՝ որպէսզի ընդդիմութիւնը չկարողանայ ազդել կառավարութեան վրայ, եւ վարչապետը ունենայ լիակատար ազատութիւն։
ՀՀ Սահմանադրութեան ամենակարեւոր յօդուածներից մէկը՝ 205-րդ յօդուածն, այնպէս է փոխուել, որ հայ ժողովուրդն այլեւս չի կարողանայ վերահսկողութիւն ունենալ իր երկրի ճակատագրի վրայ։ ՔՊ-ական իշխանութեան գրած Սահմանադրութիւնը թոյլ է տալիս կառավարութեանը եւ Ազգային ժողովին որոշել երկրի անդամակցութիւնը միջազգային կազմակերպութիւններին՝ առանց հանրաքուէի։
Նոր Սահմանադրութեամբ անցումային դրոյթը թոյլ է տալիս, որ եթէ Հայաստանը անդամակցել է որեւէ միջազգային կազմակերպութեան մինչեւ 2015 թուականը, ապա այդ կազմակերպութեան անդամակցութիւնը կասեցնելու կամ չեղեալ յայտարարելու հարցը կարող է լուծուել միայն Ազգային ժողովի միջոցով՝ առանց հանրաքուէի։
Այս հանգամանքը յատկապէս լուրջ խնդիր է ստեղծում ԵԱՏՄ-ի անդամակցութեան դէպքում, քանի որ Հայաստանն արդէն միացել էր այդ կազմակերպութեանը 2015-ին՝ նախկին Սահմանադրութեան համաձայն։
*Օրինակը կարելի է ներբեռնել «Իշխանութիւն» լրատուականի կայքից:
