ՔՊ-ի վիճակն այնքան վատ է, որ Փաշինեանի փիարով զբաղուած արեւմտեան ինչ-որ կազմակերպութիւն ստիպուած է «թուեր կրակել». «Փաստ».
Երեկ հանրայնացուած «իմպորտնի» հարցումը եկաւ փաստացի հաստատելու նախօրեին մեր թերթի հրապարակած տեղեկութիւնը: Հակիրճ յիշեցնենք, որ նախորդ համարում յայտնել էինք, որ տեսնելով Փաշինեանի վարկանիշի գէտնատարած վիճակը՝ որոշուել է առաջիկայում շրջանառել սարքովի տուեալներ: Կարճ ասած՝ «թուեր կրակել»՝ Փաշինեանի ունեցած իբր բարձր վարկանիշի մասին: Եւ, ահա, առաջին քայլը. հրապարակեցին ԱՄՆ Միջազգային հանրապետական ինստիտուտի (IRI) պատուէրով արուած «սոցիոլոգիական հարցման» տուեալները:
Բայց, հանուն արդարութեան, ահագին «համեստութիւն» էին արել, հանգիստ կարող էին գրել, որ Փաշինեանը, օրինակ՝ 150 տոկոս ձայն ունի: Կատակը՝ կատակ, բայց Փաշինեանին աջակցութիւն յայտնած Վենսի կուսակցութեան վերահսկողութեան տակ գտնուող IRI-ի հրապարակած «հարցումը» սոցցանցերի հայկական սէգմենտում, անկասկած, ռեկորդ սահմանեց ծաղրական արձագանքների «գծով»:
Մի խօսքով, նախ՝ մեր նախորդ հրապարակման մէջ արուած դիտարկումները 100 տոկոսով հաստատուեցին: Փաշինեանի ու ՔՊ-ի վիճակն այնքան վատ է, որ Փաշինեանի փիարով զբաղուած արեւմտեան ինչ-որ կազմակերպութիւն ստիպուած է «թուեր կրակել»:
Երկրորդը. այդ ինչպե՞ս է ստացւում, որ նման թուեր յայտնւում են ամէն անգամ, երբ Փաշինեանի վարկանիշային վիճակը վատանում է: Հարցը, բնականաբար, հռետորական է:
Երրորդը՝ ակնյայտ է, որ ցանկանում են ցոյց տալ, թէ Փաշինեանն, իբր, աւելի շատ ձայն ունի, քան միւս հիմնական ընդդիմադիր ուժերը՝ միասին վերցրած: Մինչդեռ իրականութիւնը եւ հանրութեան իրական տրամադրութիւնները բոլորովին այլ են: Համենան դէպս, երբ շրջում ես քաղաքում ու խօսում մարդկանց հետ, երեւի ամէն երրորդի, եթէ ոչ՝ ամէն երկրորդի ցանկութիւնն այն է, որ՝ «սրանք հեռանան»:
Աւելին, մեր տեղեկութիւններով, տարբեր հարցումներ լրիւ հակառակ պատկերն են ցոյց տալիս: Միւս կողմից՝ նման հարցումներով ու նման «հարցումների» հեղինակները, կարծես, ցանկանում են վիրաւորել հայ ժողովրդին, ցոյց տալ այնպէս, թէ մեր ժողովուրդն իբր այնքան վատն է, այնքան անինքնասէր, այնքան արժանապատուութիւնից զուրկ, որ անհամարժէք է ընկալում իրականութիւնը, որ այսքան աւերներից յետոյ դեռ պատրաստ է իշխող ուժին ձայն տալ:
Իրականում դա պարզ տեխնոլոգիայ է. առաջին հերթին յուսահատութիւն են ուզում սերմանել հանրութեան շրջանում՝ դէմօտիւացնելով մարդկանց, որ չգնան ընտրութեան: Դէ, իշխանութեանը ձեռնտու է նուազ մասնակցութիւնը, որի պարագայում կայուն վարչական ռեսուրսը կարող է վճռորոշ նշանակութիւն ունենալ:
Ի դէպ, շատերն այնպիսի տպաւորութիւն էին ստացել, որ նշեալ հարցումն անցկացուել է բացառապէս քպականների շրջանում: Այդ պարագայում նշեալ ցուցանիշները, այդ թւում՝ Նիկոլ Փաշինեանի՝ մօտ 24 տոկոս վարկանիշը կարող է եւ տրամաբանական լինել…
