Կոչ ենք անում պաշտպանել Ռուբէն Վարդանեանի եւ ապօրինաբար դատապարտուած միւս հայերի իրաւունքները եւ կոնկրէտ քայլեր ձեռնարկել նրանց ազատ արձակումն ապահովելու համար
Ռուբէն Վարդանեանի իրաւաբանական թիմի յայտարարութիւնը.
«Սոյն թուականի փետրուարի 17-ին Բաքուի ռազմական դատարանը մեղադրական որոշում կայացրեց Ռուբէն Վարդանեանի նկատմամբ՝ նրան դատապարտելով քսան տարուայ ազատազրկման: Այս վճիռն անկախ եւ անաչառ դատական գործընթացի արդիւնք չէ, այլ քաղաքական նկատառումներով պայմանաւորուած վարոյթի կանխատեսելի հետեւանք՝ ամբողջութեամբ անհամատեղելի արդար դատաքննութեան երաշխիքների հետ։
Որպէս նրա իրաւաբանական թիմի ներկայացուցիչներ՝ մենք յայտարարում ենք, որ այս դատաւճիռն իրաւաբանօրէն անհիմն է։
Դատավարութիւնն ի սկզբանէ ընթացել է եւ՛ Ադրբեջանի ներքին օրէնսդրութեան, եւ՛ այդ երկրի միջազգային պարտաւորութիւնների լուրջ եւ համակարգային խախտումներով: Դատարանը չի բաւարարել Քաղաքացիական եւ քաղաքական իրաւունքների միջազգային դաշնագրով եւ Մարդու իրաւունքների եւրոպական կոնուենցիայով երաշխաւորուած անկախութեան եւ անկողմնակալութեան պահանջներին: Մեղադրանքների ձեւակերպումը եւ էութիւնը խաթարել են անմեղութեան կանխաւարկածը։
Պաշտպանական կողմը զրկուած է եղել գործի նիւթերին պատշաճ ծանօթանալու հնարաւորութիւնից՝ ունենալով խիստ անբաւարար ժամանակ նիւթերի ուսումնասիրման համար։ Բազմիցս խոչընդոտուել են միջնորդութիւններ անելու եւ արդարացնող ապացոյցներ ներկայացնելու փորձերը։ Պարոն Վարդանեանին չի տրամադրուել իր կողմից ընտրուած փաստաբանի հետ լիարժէք աշխատելու հնարաւորութիւն։ Սրանք ընթացակարգային խախտումներ չէն եւ ուղղակիօրէն զրկել են Վարդանեանին արդիւնաւետ պաշտպանութիւն իրակականացնելու հիմնարար իրաւունքից։
Դատաւարութեան կողմերի հաւասարութեան սկզբունքը չի գործել։ Պարոն Վարդանեանին չի տրուել իրեն առաջադրուած մեղադրանքներն իրաւասու, անկախ ու անաչառ դատարանում վիճարկելու իրական հնարաւորութիւն: Նման հանգամանքներում դատաւճիռն անկողմնակալ լինել չի կարող։
Մեղադրանքների բնոյթն աւելի է ընդգծում մեղադրանքի քաղաքական էութիւնը։ Պարոն Վարդանեանը քրէական պատասխանատուութեան է ենթարկուել ոչ թէ ապացուցուած անյատական արարքների, այլ Արցախի/Լեռնային Ղարաբաղի ինստիտուտների հետ քաղաքական ներգրաւուածութեան ու հանրային ծառայութեան համար: Ժամանակակից քրէական օրէնսդրութիւնը, եւ՛ ներպետական, եւ՛ միջազգային, թոյլ չի տալիս քրէականացնել ինքնութիւնը, քաղաքական պատկանելութիւնը կամ կառավարման հաստատութիւնների հետ առնչութիւնը՝ առանց կոնկրէտ եւ ապացուցուած յանցաւոր գործողութիւնների։
Այս բոլոր խախտումների ամբողջութիւնը յանգեցնում է անխուսափելի եզրահանգման. Ռուբէն Վարդանեանին զրկել են արդար դատաքննութեան իրաւունքից՝ բոլոր ասպեկտներով: Նրա դատապարտումն արտայայտում է Լեռնային Ղարաբաղի էթնիկ հայերի նկատմամբ իրականացուող քաղաքականութեան օրինաչափութիւնը եւ խորը մտահոգութիւններ է առաջ բերում իրաւունքի գերակայութեան վերաբերեալ։ Հետեւաբար այս դատավարութիւնը եւս, ինչպէս միւս տասնհինգ հայերի նկատմամբ վերջերս աւարտուած դատավարութիւնը, ապօրինի է:
Կոչ ենք անում միջազգային կազմակերպութիւններին, մարդու իրաւունքների պաշտպանութեան մեխանիզմներին եւ պատասխանատու կառավարութիւններին` անյապաղ եւ կոնկրէտ քայլեր ձեռնարկել պարոն Վարդանեանի եւ Բաքւում պահուող եւ ապօրինի դատապարտուած միւս հայերի իրաւունքները պաշտպանելու եւ նրանց ազատ արձակումն ապահովելու համար: Քաղաքական դրդապատճառներով հետապնդումների նորմալիզացումը սպառնում է ոչ միայն շահագրգիռ անձանց, այլեւ միջազգային իրաւակարգի հեղինակութեանը»։
