Ն․Ս․Օ․Տ.Տ. Գարեգին Երկրորդ Ամենայն Հայոց Կաթողիկոսի հայրական օրհնութեամբ, Սրբոց Ղեւոնդեանց քահանաների նուիրական տօնի առիթով համախմբուելով համայն հայութեան հոգեւոր կենտրոն Մայր Աթոռ Սուրբ Էջմիածնում՝ վերանորոգում ենք Բարձրեալին ու մեր բարեպաշտ ժողովրդին ծառայելու սրբազան մեր ուխտը եւ վերահաստատում հաւատարմութիւնն ու սէրը առ Սուրբ Էջմիածինը եւ Ամենայն Հայոց Հայրապետը։
Ղեւոնդեանց սուրբ նահատակների օրինակը բոլոր ժամանակներում հայ հոգեւորականի համար հաւատքի եւ հոգեւոր ժառանգութեան հանդէպ նախանձախդրութեան, անմնացորդ ծառայութեան եւ հայրենեաց սիրոյ մշտահունչ պատգամ է։ Արդի աշխարհի փոփոխուող իրողութիւնների եւ ներազգային կեանքի դժուարութիւնների յանդիման կոչուած ենք Ղեւոնդեանց սխրանքի խորհրդով պաշտպանելու աշխարհասփիւռ մեր ժողովրդի ազգային ու հոգեւոր ինքնութիւնը, դարերով նուիրագործուած արժեհամակարգը եւ հաւատաւոր մեր զաւակների սրտէրում անսասան պահելու ազգասիրութեան եւ եկեղեցասիրութեան ոգին։
Առաքելական մեր Սուրբ Եկեղեցին ազգային ինքնութեան անսասան հիմքն է եւ հայրենի պետութեան կայունութեան ամուր հիմնասիւներից մէկը, որը պէտք է պահպանել եւ զօրացնել։
Վերջին ամիսներին Հայաստանի իշխանութիւնների կողմից Եկեղեցու եւ եկեղեցականների թիրախաւորմամբ եւ հետապնդումներով խաթարուել է ազգային եւ եկեղեցական մեր կեանքը։ Ստեղծուած իրավիճակը բացասական հետեւանքներ եւ լարուածութիւն է առաջ բերել մեր համայնքների կեանքում, ինչին, ցաւօք, նպաստել է նաեւ որոշ եկեղեցականների անընդունելի ընթացքը։
Նոր պառակտումներից զերծ մնալու համար հրամայական է, որպէսզի քահանաներս, մեր ուխտին ու կոչմանը հաւատարիմ, անշեղօրէն հետեւենք Առաքելական մեր Սուրբ Եկեղեցու կարգերին ու կանոններին, եղբայրասիրութեամբ հետամուտ լինենք միաբանութեան վերականգնմանը եւ առ Աստուած ապաւինութեամբ ու հաւատի գործերով արդիւնաւորենք տիրաւանդ մեր առաքելութիւնը։
Կոչ ենք անում մեր ժողովրդի զաւակներին՝ փորձութիւնների այս շրջանում աներեր պահել նախնեաց հաւատը եւ փարուած մնալ մեր Սուրբ Եկեղեցուն եւ հայոց հոգեւոր կենտրոն Մայր Աթոռ Սուրբ Էջմիածնին՝ միմեանց զօրակցութեամբ հայոց տապանը առաջնորդելու դէպի ապահով եւ լուսաւոր նաւահանգիստ։
Մեր մշտամնայ աղօթքն է, որ երկնաւոր Տերը խաղաղութեան մէջ պահի համայն աշխարհը, ապահով եւ անսասան՝ հայրենի մեր երկիրը, անխռով ու համերաշխ՝ մեր ժողովրդին եւ յաւէտ պայծառ՝ Հայաստանեայց Առաքելական Սուրբ Եկեղեցին։
«Աղաչում եմ ձեզ, եղբայրնէ՛ր, մեր Տեր Հիսուս Քրիստոսի անունով, որ բոլորդ էլ նոյն խօսքն ունենաք, եւ ձեր մէջ բաժանումներ չլինէն, այլ հաստատուն մնաք նոյն մտքի ու նոյն նպատակի մէջ» (Ա Կորնթ. Ա 10):
