Մայր աթոռի յայտարարութիւն
Մայր Աթոռը խստօրէն դատապարտում է ՀՀ Սահմանադրութեան եւ օրէնքների բացայայտ խախտումներով իշխանութիւնների հերթական միջամտութիւնը Եկեղեցու ներքին գործերին, որով քրէական վարոյթ է նախաձեռնուել եւ քրէական հետապնդում է յարուցուել Գերագոյն Հոգեւոր Խորհրդի հոգեւորական անդամների նկատմամբ՝ դատական ակտի կատարմանը խոչընդոտելու մեղադրանքով։
Յունուարի 31-ին Գերագոյն Հոգեւոր Խորհրդի հոգեւորական անդամներին ծանուցագրեր են յղել եւ պահանջել որպէս մեղադրեալ ներկայանալ Քննչական կոմիտէ, ինչը վերստին ակնյայտ վկայութիւն է Հայաստանեայց Առաքելական Սուրբ Եկեղեցու դէմ ձեռնարկուած արշաւի եւ հոգեւորականների նկատմամբ իրականացուող բռնաճնշումների։
Քրեական հետապնդման շրջանակներում արգելափակուել է Գերագոյն Հոգեւոր Խորհրդի եպիսկոպոս անդամների ելքը երկրից։ Այս դատապարտելի գործընթացը մեր պետութեան օրէնքներով եւ միջազգային պայմանագրերով ամրագրուած մարդու հիմնարար իրաւունքների կոպտագոյն խախտում է, որի նպատակն է խաթարել Հայ Առաքելական Եկեղեցու բնականոն գործունէութիւնը, մասնաւորաբար առաջիկայում Աւստրիայում գումարուելիք եպիսկոպոսական ժողովի աշխատանքները։
Մայր Աթոռը կոչ է անում Հայաստանի Հանրապետութեան իշխանութեանը եւ իրաւապահ համակարգին գործել բացառապէս ՀՀ Սահմանադրութեան եւ օրէնքի շրջանակներում, արդարութեան եւ ճշմարտութեան բարձրագոյն սկզբունքներին հաւատարմութեամբ եւ յարգել Եկեղեցու ինքնաւարութեան իրաւունքը։
